اسلام ٹائمز - کاش ولی فقیہ کے پیرو متحد ہوتے تو آج ہماری حالت یہ نہ ہوتی، سید قاضی نیاز حسین

کاش ولی فقیہ کے پیرو متحد ہوتے تو آج ہماری حالت یہ نہ ہوتی، سید قاضی نیاز حسین

اسلام ٹائمز: جامعۃ المنتظر کے پرنسپل کا آئی ایس او کے کنونشن کی اختتامی تقریب سے خطاب میں کہنا تھا کہ آئی ایس او ایک مستقل تنظیم ہے، اس کی اپی ساکھ ہے، جس سے پوری ملت آگاہ ہے اور قوم آئی ایس او کے جوانوں کو قدر کی نگاہ سے دیکھتی ہے۔

اسلام ٹائمز۔ امامیہ اسٹوڈنٹس آرگنائزیشن پاکستان کے مرکزی کنونشن کی اختتامی نشست سے خطاب کرتے ہوئے جامعۃ المنتظر کے پرنسپل علامہ سید قاضی نیاز حسین نے کہا کہ آئی ایس او نوجوانان پاکستان کی واحد نمائندہ جماعت ہے، اس حوالے آئی ایس او کی بہت ذمہ داریاں ہیں۔ انہوں نے کہا کہ آئی ایس او جہاد کر رہی ہے، اس حوالے سے نوجوانوں کی رہنمائی میں آئی ایس او کے کردار کو خراج تحسین پیش کرتا ہوں۔ انہوں نے کہا کہ مجھے اس بات پر بہت دکھ ہوتا ہے کہ ہم ایک قوم ہو کر منتشر ہیں، ہم سب نظریہ ولایت فقیہ کے ماننے والے ہیں لیکن افسوس کہ ولی فقیہ کے حکم پر بھی ہم متحد نہیں ہوتے اور القدس کی ریلی ہو تو لاہور میں القدس کی تین ریلیاں نکالی جاتی ہیں، دھرنا دینا ہو تو ہر گروپ نے اپنا الگ دھرنا دیا ہوتا ہے، آخر کیوں ہماری قوم منتشر ہے۔

انہوں نے کہا کہ اے پی سی بلائی جاتی ہے تو اس میں شیعوں کو نہیں بلایا جاتا، کہا جاتا ہے کہ ہم کس کو بلائیں آپ تو تقسیم ہیں۔ اس حوالے سے میں عرض کروں گا کہ قوم متحد ہو جائے، میں بہت کوشش کرچکا ہوں کہ ملت متحد ہوجائے لیکن میں ناکام رہا، اس حوالے سے میں علماء سے گزارش کروں گا کہ وہ آگے بڑھیں اور قوم کو متحد کریں کیونکہ ہماری بقا اسی میں ہے کہ ہماری قوم یک جان ہوجائے۔ انہوں نے کہا کہ آئی ایس او ایک مستقل تنظیم ہے، اس کی اپی ساکھ ہے، جس سے پوری ملت آگاہ ہے اور قوم آئی ایس او کے جوانوں کو قدر کی نگاہ سے دیکھتی ہے۔ اس حوالے سے میں آئی ایس او سے کہوں گا کہ وہ کسی جماعت کی آلہ کار نہ بنے بلکہ اپنا الگ تشخص برقرار رکھے۔
انہوں نے کہا کہ آئی ایس او اگر کسی جماعت کے ساتھ وابستہ ہو جاتی ہے تو اس جماعت کی خوبیاں تو اس کے حق میں جائیں گی لیکن اس کی خامیاں آئی ایس او کے حصے میں آ جائیں گی، اس لئے نوجوان آگاہ رہیں اور اپنا تشخص قائم رکھیں۔ انہوں نے کہا کہ میں کسی بھی تنظیم کو نشانہ نہیں بنا رہا، نہ کسی پر تنقید کر رہا ہوں، میں اپنے دل کا درد بیان کر رہا ہوں، میرے لئے تمام جماعتیں قابل احترام ہیں۔