QR Code

حکومت پاکستان دہشت گردوں کے سامنے ڈھیر، پھانسی کی سزا پر عمل نہ کرنے کا فیصلہ

4 Oct 2013 08:36

اسلام ٹائمز: غیر ملکی خبر رساں ادارہ کے ساتھ بات کرتے ہوئے ترجمان وزارت داخلہ کا کہنا تھا کہ پاکستان عالمی برادری سے کئے گئے وعدوں کو مقدم سمجھتا ہے۔

اسلام ٹائمز۔ حکومت پاکستان نے دہشت گردی سمیت مختلف جرائم میں موت کی سزا پانے والے قیدیوں کی سزاؤں پر عمل درآمد نہ کرنے کا فیصلہ کیا ہے۔ غیر ملکی خبر رساں ادارے کو دیئے گئے اپنے انٹرویو میں وزارت داخلہ کے ترجمان عمر حامد خان نے کہا ہے کہ ایک ذمہ دار ملک ہونے کی حیثیت سے پاکستان بین الاقوامی اداروں سے کئے گئے اپنے وعدوں کی پاسداری کو مقدم سمجھتا ہے، اسی بنیاد پر حکومت پاکستان نے قیدیوں کو ملنے والی موت کی سزاؤں پر عمل درآمد نہ کرنے کا فیصلہ کیا ہے۔ پیپلز پارٹی کی حکومت نے 2008ء میں سزائے موت پر عمل درآمد نہ کرنے کا فیصلہ کیا تھا، جس کی مدت 30جون کو ختم ہو گئی تھی۔ جس کے بعد نئی حکومت نے ان سزاؤں پر عمل درآمد کو عندیہ دیا تاہم حکومت اس وقت کے صدر آصف علی زرداری کی درخواست پر ان کی مدت صدارت تک ان سزاؤں پر عمل درآمد نہ کرانے پر تیار ہو گئی تھی۔ دوسری جانب کالعدم تحریک طالبان پاکستان نے بھی دھمکی دی تھی کہ اگر ان کے زیر حراست ساتھیوں کو پھانسی دی گئی تو اس کے سنگین نتائج برآمد ہونگے۔

خبر کا کوڈ: 308001