QR Code

عزاداری کے اجتماعات کو پہلے سے زیادہ منظم کرنے کی ضرورت ہے

شیعہ مکتب فکر میں تمام مسالک کا احترام واجب ہے، علامہ ناصر عباس جعفری

11 Oct 2013 20:50

اسلام ٹائمز: سرگودھا میں مجلس عزاء سے خطاب کرتے ہوئے ایم ڈبلیو ایم کے مرکزی سیکرٹری جنرل کا کہنا تھا کہ پورے پاکستان میں علماء، ذاکرین، ماتمی، انقلابی اگر کسی پلٹ فارم پر اکھٹے ہیں تو وہ ایم ڈبلیو ایم ہے۔

اسلام ٹائمز۔ مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے کہا ہے کہ ماہ محرم الحرام نزدیک ہے، لہذا پورے پاکستان میں عزاداری کے اجتماعات کو پہلے سے زیادہ منظم کرنے کی ضرورت ہے۔ علماء، ذاکرین، ماتمی انجمنوں اور اسکائوٹس رضا کاروں کی ذمہ داریاں پہلے سے زیادہ بڑھ گئی ہیں۔ ان خیالات کا اظہار انہوں نے سرگودھا میں ذاکر اہل بیت (ع) مشتاق شاہ کی جانب سے منعقد کی جانے والی مجلس عزا سے خطاب کرتے ہوئے کیا۔ ان کا کہنا تھا کہ علماء اور خطباء اپنے سامعین کو قومی اتحاد و وحدت کی تاکید کریں، شیعہ مکتب فکر میں تمام مسالک کا احترام واجب ہے۔ کسی بھی مسلمان کی دل آزاری آئمہ معصومین (ع) کو ناراض کرنے کا باعث بنتی ہے۔ انہوں نے مزید کہا کہ ہمارے پاس اہل بیت علیہم السلام کے اتنے فضائل موجود ہیں کہ ہمیں کسی دوسرے کی جانب توجہ کرنے کی ضرورت ہی نہیں۔ مجلس وحدت مسلمین پاکستان الحمد اللہ اپنے بنیادی ہدف یعنی ملی وحدت کی جانب احسن انداز میں سفر کر رہی ہے۔ انہوں نے کہا کہ پورے پاکستان میں علماء، ذاکرین، ماتمی، انقلابی اگر کسی پلٹ فارم پر اکھٹے ہیں تو وہ ایم ڈبلیو ایم ہے۔ وہ وقت دور نہیں کہ جب ہم باہمی اتحاد و وحدت سے پاکستان میں عزاداری کے دشمنوں کو نامراد کریں گے۔

خبر کا کوڈ: 310392