QR Code

فکر اقبال سے رہنمائی لئے بغیر تکمیل پاکستان کا خواب پورا نہیں ہوسکتا، محمد اختر قریشی

9 Nov 2013 20:44

اسلام ٹائمز: تحریک صوبہ ملتان کے وائس چیئرمین کا یوم اقبال کے موقع پر تقریب سے خطاب کرتے ہوئے کہناتھا کہ علامہ اقبال نے اپنی شاعری کے زریعے برصغیر کے مسلمانوں کو حقیقی منزل سے آشنا کیا، مفکر پاکستان نے ہمیں ہر قسم کے تعصبات سے بالاتر ہونے کا درس دیا۔

اسلام ٹائمز۔ تحریک صوبہ ملتان کے سینئر وائس چیئرمین محمد اختر قریشی نے کہا ہے کہ آج ہمارا معاشرہ جس تباہی کی طرف جارہا ہے اس سے نجات صرف اور صرف فکر اقبال پر عمل کرنے سے ہی ممکن ہے۔ وہ تحریک صوبہ ملتان کے زیر اہتمام چوک ڈبل پھاٹک پر یوم اقبال کے حوالے سے ایک تقریب سے خطاب کررہے تھے۔ انہوں نے کہا کہ آج ہمیں رہنمائی کیلئے علامہ اقبال کے افکار سے روشنی حاصل کرنی چاہیے۔ آج دشمن ہمیں لسانی، نسلی، صوبائی، مذہبی تفرقوں میں تفریق کرنا چاہتا ہے جبکہ علامہ اقبال نے ہمیں ان سارے تعصبات سے بالا تر ہونے کا درس دیا ہے۔ علامہ اقبال نے برصغیر پاک و ہند کے مسلمانوں کو گمراہی سے نکال کر حقیقی منزل سے آشنا کیا۔ انہیں دو قومی نظریے کا شعور دیا، جس پر عمل کرتے ہوئے قائد اعظم محمد علی جناح نے قیام پاکستان کیلئے جدوجہد کی اور پاکستان کی شکل میں ایک آزاد ملک عطا کیا۔ آج ہمارا فرض بنتا ہے کہ تکمیل پاکستان کیلئے بھی اسی طرح علامہ اقبال کے فکر وفلسفہ پر عمل کریں جیسے قیام پاکستان کے وقت تحریک پاکستان کے قائدین نے ان کے فکر وفلسفہ کو مشعل راہ بنایا تھا۔ اس موقع پر خواجہ محمد شریف، احسان علی، ملک سلطان، احمد علی صدیقی، ڈاکٹر سجاد علی اوردیگر نے شرکت کی۔

خبر کا کوڈ: 319369