QR Code

سانحہ راولپنڈی کیلئے قائم جوڈیشل کمیشن کا متاثرہ امام بارگاہوں اور مساجد کا دورہ

1 Dec 2013 21:36

اسلام ٹائمز: ایم ڈبلیو ایم کے وکلاء پینل کیطرف سے دائر درخواست میں مؤقف اختیار کیا گیا کہ جوڈیشل کمیشن نے ایک مسجد اور مارکیٹ کا دورہ تو کیا ہے لیکن تکفیریوں کے ہاتھوں جلائی گئی دیگر مساجد اور امام بارگاہوں کا دورہ نہیں کیا۔

اسلام ٹائمز۔ سانحہ راولپنڈی کیلئے قائم جوڈیشل کمیشن نے تکفیری دہشتگردوں کے ہاتھوں جلائی گئی امام بارگاہوں اور مساجد کا دورہ کیا اور وہاں پر موجود متولیان، عینی شاہدین اور اہل محلہ سے معلومات حاصل کیں۔ مجلس وحدت مسلمین کی طرف سے سانحہ کی تحقیقات کیلئے تشکیل دیئے گئے پینل میں شامل ایڈووکیٹ اصغر علی مبارک، سید اجمل زیدی اور آغا سیدین ایڈووکیٹ نے جوڈیشل کمیشن میں رٹ دائر کی، جس میں موقف اختیار کیا گیا کہ کمیشن نے راجہ بازار میں ایک مسجد اور مارکیٹ کا دورہ تو کیا ہے لیکن تکفیریوں کے ہاتھوں جلائی گئی مساجد اور امام بارگاہوں کا دورہ نہیں کیا، چاہیے تو یہ تھا کہ کمیشن اسی روز ہی ان مساجد اور امام بارگاہوں کا دورہ کرتا اور حقائق جانتا۔
 درخواست میں کمیشن سے استدعا کی گئی کہ وہ ان متاثرہ مساجد اور امام بارگاہوں کا دورہ کرے، تاکہ تحقیقات اصل رخ پر ہوسکیں۔ اس پر کمیشن کے سربراہ جسٹس مامون الرشید نے کمشنر راولپنڈی، ڈپٹی کمشنر راولپنڈی، اسسٹنٹ کمشنر راولپنڈی، ایس پی سکیورٹی اور علاقہ مجسٹریٹ کے ہمراہ متاثرہ امام بارگاہوں کا دورہ کیا اور وہاں پر موجود متولیان، عینی شاہدین اور اہل محلہ سے معلومات اکٹھی کیں۔ اس موقع پر پنجاب کیمیکل لیب کے وفد نے بھی متاثرہ امام بارگاہوں اور مساجد کا دورہ کیا اور وہاں سے سمپلز اکٹھے کئے۔

خبر کا کوڈ: 326487