QR Code

پاکستان اور امریکہ کے درمیان اسٹریٹیجک مذاکرات 27 جنوری کو ہوں گے

17 Jan 2014 21:46

اسلام ٹائمز: دفتر خارجہ کی ترجمان تسنیم اسلم نے جمعرات کو ہفتہ وار نیوز بریفنگ میں کہا تھا کہ واشنگٹن میں جان کیری اور سرتاج عزیز کی ملاقات اور دونوں ممالک کے ہونے والے اجلاس میں توقع ہے کہ علاقائی صورتحال بھی زیر بحث آئے گی۔

اسلام ٹائمز۔ دفتر خارجہ کے بیان میں کہا گیا کہ وزیراعظم نوازشریف کے مشیر برائے اُمور خارجہ و قومی سلامتی سرتاج عزیز پاکستانی وفد کی قیادت کریں گے جب کہ امریکی وفد کی سربراہی وزیر خارجہ جان کیری کریں گے۔ بیان میں کہا گیا کہ دونوں ملکوں کے درمیان وزرائے خارجہ سطح کے اسٹریٹیجک مذاکرات گزشتہ سال اگست میں بحال ہوئے جب امریکہ کے وزیر خارجہ جان کیری نے پاکستان کا دورہ کیا تھا۔ پاکستانی وزارت خارجہ کے مطابق یہ مذاکرات دونوں ملکوں کے درمیان مشترکہ مفادات کو آگے بڑھانے کے عزم کا اظہار ہیں جن میں باہمی مفاد پر مشتمل مختلف شعبوں میں تعاون شامل ہے۔

بیان کے مطابق واشنگٹن میں ہونے والے اجلاس میں پہلے سے وضع کردہ پانچ مختلف ورکنگ گروپوں کی سطح کے اجلاسوں میں ہونے والی پیش رفت کا جائزہ لیا جائے گا جن میں دفاع، توانائی، اقتصادی ترقی اور انسداد دہشت گردی سے متعلق شعبوں میں دوطرفہ تعاون شامل ہے۔ وزرات خارجہ کے بیان میں کہا گیا کہ اسٹریٹیجک مذاکرات یہ موقع بھی فراہم کریں گے کہ پاکستان اپنی اقتصادی ترقی، تجارت اور سرمایہ کاری بڑھانے کی اپنی حکمت عملی پر بھی بات کرے۔ پاکستانی دفتر خارجہ کی ترجمان تسنیم اسلم نے جمعرات کو ہفتہ وار نیوز بریفنگ میں کہا تھا کہ واشنگٹن میں ہونے والے اجلاس میں توقع ہے کہ علاقائی صورتحال بھی زیر بحث آئے گی۔ پاکستان اور امریکہ کے تعلقات میں بھی حالیہ برسوں میں اتار چڑھاؤ دیکھا گیا لیکن حکام کے مطابق وزیراعظم نواز شریف کے اکتوبر میں دورہ واشنگٹن نے دوطرفہ تعلقات کے لیے ایک نئی بنیاد فراہم کی ہے۔

خبر کا کوڈ: 342184