QR Code

سرائیکی علاقوں پر غیر مقامی آبادی کا سیلاب روکا جائے، ظہور دھریجہ

7 Feb 2014 22:59

اسلام ٹائمز: ڈیرہ اسماعیل خان میں تقریب سے خطاب کرتے ہوئے سرائیکستان قومی کونسل کے صدر نے کہا ہے کہ ٹانک اور ڈی آئی خان سمیت ہمارے مکمل جغرافیہ پر مشتمل سرائیکی صوبہ بنایا جائے۔

اسلام ٹائمز۔ سرائیکستان قومی کونسل کے صدر ظہور دھریجہ نے کہا ہے کہ غیر مقامی عناصر کے ہاتھوں سرائیکی علاقوں کی لوٹ مار کا سلسلہ اب بند ہونا چاہیئے۔ ہزارہ صوبہ کے بل کے ساتھ صوبہ سرائیکستان کا بھی بل پاس کرایا جائے۔ ان خیالات کا اظہار انہوں نے ڈیرہ اسماعیل خان کے علاقے ماہڑہ میں سرائیکی قومی کونسل کی تقریب سے خطاب کرتے ہوئے کیا۔ انہوں نے کہا ضیاء دور کے بعد سرائیکی وسیب پر بدترین عذاب آیا۔ افغان جنگ کے نتیجے میں غیر مقامی آبادی کو ڈیرہ کی راہ دکھائی گئی۔ انہوں نے کہا سوچی سمجھی سازش کے تحت ڈیرہ میں فرقہ واریت کو فروغ دیکر مقامی آبادی کا قتل عام کرایا گیا، اور غیر مقامی اقلیت کو اکثریت پر غالب لانے کی مذموم کوشش کی گئی۔ انہوں نے کہا ہمارا مطالبہ ہے کہ سرائیکی پٹی کے ساتھ اس ظلم ناروا کو اب بند کیا جائے اور ٹانک، ڈیرہ سمیت سرائیکی جغرافیہ پر مشتمل صوبہ بنایا جائے۔ انہوں نے مزید کہا کہ وزیراعلٰی خیبر پختونخواہ ہزارہ صوبہ کا بل پیش کرنے جا رہے ہیں۔ ہمارا مطالبہ ہے کہ ہزارہ صوبے کے بل کے ساتھ صوبہ سرائیکستان کا بھی بل منظور کیا جائے۔ اس موقع پر سید حفیظ گیلانی، عباس سیال اور ساجد دامانی نے بھی خطاب کیا۔ انہوں نے کہا ٹانک، ڈیرہ اسماعیل خان سمیت سرائیکی ریجن الگ بنا کر سی ایس ایس کا کوٹہ مقرر کیا جائے۔ این ایف سی ایوارڈ الگ دیا جائے اور پسماندہ سرائیکی وسیب کے غریب بچوں کی سکالر شپ کے لیے ملنے والی گرانٹ میں ٹانک اور ڈیرہ اسماعیل خان کو شامل کیا جائے۔

خبر کا کوڈ: 349397