QR Code

فیسوں میں اضافے کیخلاف گومل یونیورسٹی کے طلباء کا احتجاج

9 Apr 2014 00:31

اسلام ٹائمز: ڈی وی ایم ڈیپارٹمنٹ کے طلباء نے آفتاب احمد، منظور محسود اور دیگر طلباء کی قیادت میں احتجاج کرتے ہوئے ملتان روڈ بلاک کرنیکی کوشش کی تاہم پولیس نے طلباء کو یونیورسٹی میں دھکیل کر گیٹ بند کر دیئے، دھکم پیل میں کئی طلباء زخمی ہو گئے۔

اسلام ٹائمز۔ امتحانی فیسوں میں اضافے کیخلاف گومل یونیورسٹی طلباء نے شدید احتجاج کیا ہے۔ گومل یونیورسٹی سٹی کیمپس میں واقع ڈی وی ایم ڈیپارٹمنٹ کے طلباء نے آفتاب احمد، منظور محسود اور دیگر طلباء کی قیادت میں احتجاج کیا، اور ڈیرہ ملتان روڈ بلاک کرنیکی کوشش کی، تاہم پولیس کی بھاری نفری نے طلباء کو روڈ سے یونیورسٹی کے اندر دھکیل کر گیٹ بند کردیئے۔ اس دھکم پیل میں کئی طلباء زخمی بھی ہوئے۔ احتجاج کرنیوالے طلباء کے مطابق یونیورسٹی انتظامیہ نے امتحانی فیسوں کا خاتمہ کیا تھا، لیکن اب رجسٹرار گومل یونیورسٹی نے نیا نوٹیفیکیشن جاری کیا ہے۔ جس سے طلباء کو امتحانی فیسیں ادا کرنی پڑیں گی۔ آفتاب احمد نے کہا کہ یہ طلباء کیساتھ سراسر زیادتی ہے۔ اس کو فوری طور پر واپس لیا جائے۔ وائس چانسلر ڈاکٹر عنایت اللہ بابر موقع پر پہنچ گئے اور انہوں نے طلباء کو یقین دہانی کرائی کہ وہ اس مسئلے کو ترجیحی بنیادوں پر حل کرینگے۔ جسکے بعد طلباء نے اپنا احتجاج ختم کر دیا۔ طلباء کے احتحاج ختم کرنے کے بعد پولیس نے یونیورسٹی کے گیٹ کھول دیئے اور اپنی نفری بھی ہٹالی۔

خبر کا کوڈ: 370792