اسلام ٹائمز - کارکن قتل ہوئے تو جنازے وزیراعظم ہاؤس میں ہونگے، ڈاکٹر طاہر القادری

کارکن قتل ہوئے تو جنازے وزیراعظم ہاؤس میں ہونگے، ڈاکٹر طاہر القادری

اسلام ٹائمز: روانگی سے قبل ہیتھرو ائیرپورٹ پر میڈیا سے گفتگو کرتے ہوئے پاکستان عوامی تحریک کے سربراہ نے کہا ہے غریبوں کے حقوق کیلئے آخری حد تک جائیں گے، ہمارا راستہ تشدد کا نہیں بلکہ امن اور روشنی کا ہے، لیکن پتہ نہیں کیوں حکومت بوکھلا گئی ہے۔

اسلام ٹائمز۔ پاکستان عوامی تحریک اور منہاج القرآن کے سربراہ ڈاکٹر علامہ طاہر القادری پاکستان واپس آنے کے لئے لندن سے دبئی روانہ ہو گئے ہیں، ایمریٹس ایئر لائن کی یہ پرواز رات سوا ایک بجے دبئی پہنچے گی۔ وہاں کچھ دیر قیام کے بعد ڈاکٹر طاہر القادری صبح سوا چار بجے پاکستان کے لئے روانہ ہوں گے اور صبح ساڑھے سات بجے کے قریب اسلام آباد پہنچیں گے۔روانگی سے قبل لندن کے ہیتھرو ایئر پورٹ پر میڈیا سے گفتگو کرتے ہوئے ڈاکٹر طاہرالقادری نے کہا کہ میں نے مستقل طور پر پاکستان آنے کا وعدہ پورا کر دیا ہے اب واپسی نہیں ہوگی۔ انقلاب کو اب کوئی نہیں روک سکتا یہ عوام کا مقدر بن چکا ہے، کارکنوں نے خون دے کر انقلاب کا آغاز کر دیا ہے۔ انہو ں نے کارکنوں پر گولیاں برسانے کی مذمت کرتے ہوئے کہا کہ ہم کسی قسم کا خون خرابہ نہیں چاہتے لیکن کارکنوں کو تشدد پر مجبور کیا جا رہا ہے۔ پنجاب حکومت نے استقبال سے کارکنوں کو روکنے کے لئے رات گئے چھاپے مار کر متعدد رہنماﺅں اور کارکنوں کو گرفتار کر لیا ہے۔ جیالوں کو اسلام آباد پہنچنے سے روکا جا رہا ہے اور جگہ جگہ رکاوٹیں ڈالی جا رہی ہیں۔ ڈاکٹر طاہر القادری نے کہا کہ وہ پرامن طریقے سے لاہور جانا چاہتے ہیں۔ انہوں نے کہا کہ ہمارا راستہ تشدد کا نہیں امن اور روشنی کا ہے لیکن حکومت پتہ نہیں کیوں بوکھلا گئی ہے، حکمران رکاوٹیں ڈال کر اپنے اقتدار کی قبر خود کھود رہے ہیں۔ طاہر القادری نے کہا کہ وہ غریبوں کے حقوق کے لئے آخری حد تک جائیں گے۔ انقلاب کی جدو جہد کے دوران انہیں یا ان کے کسی کارکن کو قتل کیا گیا تو اب جنازے وزیراعظم ہاؤس میں ہوں گے۔