QR Code

کوئی مائی کا لال ڈاکٹر طاہر القادری کو گرفتار کرنے کی جرات نہیں کرسکتا، رہنما پاکستان عوامی تحریک

13 Nov 2014 22:06

اسلام ٹائمز: ڈاکٹر طاہر القادری کے وارنٹ گرفتاری جاری ہونے پر اپنے ردعمل کا اظہار کرتے ہوئے رہنمائوں کا کہنا تھا کہ اگر حکومت نے ڈاکٹر طاہر القادری کو گرفتار کرنے کی حماقت کی تو ملک میں خانہ جنگی شروع ہوجائے گی۔

اسلام ٹائمز۔ پاکستان عوامی تحریک ملتان کے عہدیداران یاسر ارشاد، میجر محمد اقبال چغتائی، مہر فدا حسین، رائو محمد عارف رضوی، ادریس انصاری، چوہدری محمد اکرم گجر اور دیگر نے ڈاکٹر طاہر القادری کے وارنٹ گرفتاری جاری ہونے پر اپنے شدید ردعمل کا اظہار کرتے ہوئے کہا ہے کہ کسی ماں نے ایسا لال پیدا ہی نہیں کیا جو ڈاکٹر طاہر القادری کی طرف میلی آنکھ سے بھی دیکھ سکے۔ ڈاکٹر طاہر القادری پوری دنیا میں عالمی سفیر امن کے نام سے جانے جاتے ہیں۔ کتنا ظلم ہے کہ ماڈل ٹائون اور اسلام آباد میں معصوم انسانوں کے قاتل تو کھلے عام دندناتے پھر رہے ہیں اور عالمی سفیر امن کے وارنٹ گرفتاری جاری کردئے گئے ہیں۔ انہوں نے کہا کہ حکمران ہوشن کے ناخن لیں اگر ایسی کوئی بھی حرکت کی گئی تو انہیں ہزاروں لاشوں کے اوپر سے گزرنا پڑے گا۔اگر حکومت نے ڈاکٹر طاہر القادری کو گرفتار کرنے کی حماقت کی تو پورے ملک میں خانہ جنگی شروع ہوجائے گی۔ حکمران انقلابیوں کے جذبے سے واقف ہیں۔ اتفاق فائونڈری کا لوہا کم پڑ جائے گا مگر انقلابیوں کے ہاتھ کم نہیں پڑیں گے۔ ایسے لگتا ہے کہ حکمرانوں نے اپنی غلطیوں سے کچھ نہیں سیکھا۔ وہ وقت دور نہیں جب حکمران خود جیل کی سلاخوں کے پیچھے ہونگے۔ انہوں نے کہا کہ ہم ڈاکٹر طاہر القادری اور دیگر قائدین کے وارنٹ گرفتاری جاری کرنا انتہائی افسوسناک ہے۔ حکمران قانون اور پولیس کو ذاتی مقاصد اور سیاسی مخالفین کے خلاف استعمال کرکے زیادہ عرصہ اپنے اقتدار پر قائم نہیں رہ سکتے۔

خبر کا کوڈ: 419406