QR Code

فوجی عدالتیں صرف دہشتگردی کے کیسوں سے نمٹنے کیلئے قائم کی جائیں گی، پرویز رشید

30 Dec 2014 23:10

اسلام ٹائمز: وزیر اطلاعات کا کہنا تھا کہ خصوصی عدالتیں دہشتگردوں سے نمٹنے اور انکے کیس چلانے کیلئے قائم کی جائیں گے اور ہم انکا غلط استعمال نہیں ہونے دینگے، مجرموں کو ثبوت کی بنیاد پر دفاع کا موقع دیا جائے گا۔

اسلام ٹائمز۔ وفاقی وزیر اطلاعات پرویز رشید نے کہا ہے کہ فوجی عدالتیں صرف دہشت گردی کے کیسوں سے نمٹنے کے لیے قائم کی جائیں گی اور ان کا غلط استعمال نہیں ہونے دیں گے۔ یورپین پارلیمنٹ کے نمائندے سے ملاقات وزیر اطلاعات سینیٹر پرویز رشید کا کہنا تھا کہ سانحہ پشاور نے پوری قوم کو ہلا کر رکھ دیا ہے، بچوں کی جانوں کا ضیاع پاکستان کے مستقبل کے لئے بڑا نقصان ہے، قوم مشترکہ کوششوں سے دہشتگردوں کے عزائم کو ناکام بنا دے گی۔ انہوں نے کہا کہ کئی ممالک میں سزائے موت پر پابندی عائد نہیں اور پاکستان میں صرف دہشت گردی سے متعلق مقدمات میں سزائیں دی جا رہی ہیں، جبکہ حکومت انسانی حقوق کے احترام کے لئے تمام تر ضروری اقدامات کرے گی۔ پرویز رشید کا کہنا تھا کہ خصوصی عدالتیں دہشت گردوں سے نمٹنے اور ان کے کیس چلانے کے لئے قائم کی جائیں گے اور ہم ان کا غلط استعمال نہیں ہونے دیں گے، مجرموں کو ثبوت کی بنیاد پر دفاع کا موقع دیا جائے گا، جبکہ ماورائے عدالت سزائے موت کے واقعات نہیں ہونے دیں گے۔

خبر کا کوڈ: 429320