QR Code

ظالمانہ لوڈشیڈنگ کیخلاف ٹانک کے عوام عید نماز گرڈ اسٹیشن میں ادا کرینگے

23 Sep 2015 00:16

اسلام ٹائمز: ٹانک شہر میں چودہ سے سولہ گھنٹے، جبکہ مضافاتی علاقوں میں اٹھارہ سے بیس گھنٹے کی غیراعلانیہ لوڈشیڈنگ جاری ہے، جس کے خلاف شہریوں نے ایک بہت بڑا احتجاجی مظاہرہ کیا، مظاہرے کے دوران ڈیرہ ٹانک مکمل طور پر بندرہا۔

اسلام ٹائمز۔ طویل اور ظالمانہ لوڈشیڈنگ کے خلاف احتجاجی مظاہرہ کرتے ہوئے ٹانک کے شہریوں نے اعلان کیا ہے کہ واپڈا نے اگر اپنا قبلہ درست نہیں کیا تو وہ عید نماز گرڈ سٹیشن میں ادا کریں گے۔ ٹانک شہر میں اس وقت چودہ سے سولہ گھنٹے جبکہ مضافاتی علاقوں میں اٹھارہ سے بیس گھنٹے طویل لوڈشیڈنگ کا سلسلہ جاری ہے۔ جس کے خلاف شہریوں نے ایک بہت بڑا احتجاجی مظاہرہ کیا ہے۔ عوام کا جم غفیر ریلی کی صورت میں صابر مین اور اڈا بازار سے ہوتا ہوا کشمیر چوک پہنچا۔ جہاں یہ ریلی احتجاجی جلسے میں تبدیل ہوگئی۔ ریلی کی قیادت اور کال صنم گل صدر ٹانک ویلفیئر سوسائٹی نے دی تھی۔ احتجاجی جلسے سے خطاب کرتے ہوئے مقررین کا کہنا تھا کہ بجلی کی فراہمی کے حوالے سے ٹانک کے ساتھ سوتیلی ماں والا سلوک کیا جارہا ہے۔ واپڈا نے اگر اپنا قبلہ درست نہیں کیا تو شہری عید کی نماز گرڈ سٹیشن میں ادا کرینگے۔ احتجاجی مظاہرے کے دوران تمام بازار اور مارکیٹس بند تھیں، جبکہ ڈیرہ ٹانک روڈ کو بھی ہرقسم کی ٹریفک کیلئے بند کردیا گیا۔ اس موقع پر پولیس کی بھاری نفری بھی تعینات رہی۔

خبر کا کوڈ: 487011