اسلام ٹائمز - بھارت نے سید علی گیلانی کا پاسپورٹ معطل کر دیا

بھارت نے سید علی گیلانی کا پاسپورٹ معطل کر دیا

اسلام ٹائمز: پاسپورٹ کی معطلی پر اپنے رد عمل میں حریت رہنما کا کہنا تھا کہ پاسپورٹ معطل کرنے کا مطلب ہے کہ بھارتی حکومت بوکھلاہٹ کا شکار ہے۔ نواز شریف جنرل اسمبلی میں مسئلہ کشمیر جرأت مندانہ انداز میں اٹھائیں۔

اسلام ٹائمز۔ بھارتی حکومت نے حریت رہنما سید علی گیلانی کا پاسپورٹ معطل کر دیا۔ بھارتی میڈیا کے مطابق سید علی گیلانی کا پاسپورٹ چار ہفتوں کے لیے معطل کیا گیا ہے، انہوں نے امریکا میں او آئی سی اجلاس میں شرکت کرنا تھی۔ سید علی گیلانی نے پاسپورٹ کی معطلی پر اپنے رد عمل میں کہا ہے کہ پاسپورٹ معطل کرنے کا مطلب ہے کہ بھارتی حکومت بوکھلاہٹ کا شکار ہے۔ میڈیا سے خصوصی گفتگو کرتے ہوئے انہوں نے کہا کہ بھارتی حکومت انہیں او آئی سی کے اجلاس میں شرکت سے روکنا چاہتی ہے۔ بھارتی حکومت کو خوف ہے کہ وہ اس کے جمہوری دعوؤں کی قلعی کھول دیں گے۔ مقدمات، پابندیاں، گرفتاریاں بھارت کے بھیانک کردار کو چھپا نہیں سکتیں۔ انہوں نے کہا کہ عالمی برادری کشمیریوں کے ساتھ بھارتی حکومت کے مجرمانہ سلوک کا نوٹس لے، نواز شریف جنرل اسمبلی میں مسئلہ کشمیر جرأت مندانہ انداز میں اٹھائیں۔