اسلام ٹائمز - مغرب جس بھی بین الاقوامی تنازع کا حصہ بنتا ہے اس میں مزید سنگینی آجاتی ہے، ولادیمیر پیوٹن

مغرب جس بھی بین الاقوامی تنازع کا حصہ بنتا ہے اس میں مزید سنگینی آجاتی ہے، ولادیمیر پیوٹن

اسلام ٹائمز: ایک جرمن اخبار کو دیئے جانیوالے انٹرویو میں روسی صدر کا کہنا تھا کہ مغرب کی جانب سے ماضی میں عراق اور لیبیا میں کئے جانے والے فوجی آپریشنز کی بدولت ان ممالک اور خطے میں دہشت گردی کی کارروائیوں میں اضافہ ہوا ہے۔

اسلام ٹائمز۔ روس کے صدر ولادیمیر پیوٹن نے کہا ہے کہ روس باقی دنیا کے ساتھ مل کر دہشت گردی کے خلاف جنگ لڑنا چاہتا ہے، تاہم انہوں نے کہا کہ مغرب جس بھی بین الاقوامی تنازع کا حصہ بنتا ہے اس میں مزید سنگینی آجاتی ہے۔ پیوٹن نے ایک جرمن اخبار کو دئیے جانے والے انٹرویو میں کہا کہ "ہم سب کو ایک سے خطرات کا سامنا ہے۔ ہماری خواہش ہے کہ یورپ سمیت باقی دنیا میں بھی ان خطرات کا مقابلہ کرنے کے لئے کوششوں کو متحد کریں اور اسی مقصد کے لئے کوششیں کی جا رہی ہیں۔ ان کا مزید کہنا تھا کہ "میں صرف دہشت گردی کی بات نہیں کر رہا بلکہ اس میں جرم، انسانی سمگلنگ، ماحولیاتی تحفظ اور دیگر عام امور پر تعاون شامل ہوں گے۔ اس کا یہ مطلب ہرگز نہیں ہے کہ ہم اس میں دوسرے ممالک کی ہر بات میں ہاں میں ہاں ملاتے رہیں گے۔ پیوٹن کا کہنا تھا کہ مغرب کی جانب سے ماضی میں عراق اور لیبیا میں کئے جانے والے فوجی آپریشنز کی بدولت ان ممالک اور خطے میں دہشت گردی کی کارروائیوں میں اضافہ ہوا ہے، نیٹو کی جانب سے روس کی سرحدوں کی جانب توسیع اور امریکا کی جانب سے ایک میزائل شکن شیلڈ لگانے پر تنقید کرتے ہوئے کہا کہ مغرب کی جانب سے یہ توسیع بین الاقوامی تنازعات کو مزید ہوا دینے کی کوشش ہے۔