QR Code

نواز حکومت تیل سے بجلی پیدا کرکے ملکی خزانے پر بوجھ ڈال رہی ہے، پرویز مشرف

10 Feb 2016 12:48

اسلام ٹائمز: ڈی ایچ اے گالف کلب میں تقریری مقابلہ کے موقع پر پرویز مشرف نے کہا کہ بجلی کا سب سے سستا ذریعہ پانی سے بجلی بنانے کا ہے، ہوا، سورج کی روشنی، کوئلے اور ایٹمی توانائی سے بھی سستی بجلی بنائی جا سکتی ہے، مگر نواز حکومت تیل سے بجلی بنا رہی ہے، جو قومی خزانے پر بوجھ ہے۔

اسلام ٹائمز۔ سابق صدر مملکت اور آل پاکستان مسلم لیگ کے سربراہ جنرل (ر) پرویز مشرف نے کہا ہے کہ نواز حکومت تیل سے بجلی پیدا کرکے ملکی خزانے پر بوجھ ڈال رہی ہے، ملکی ترقی نوجوانوں کے ہاتھ میں ہے، نوجوانوں کی کردار سازی وقت کی اہم ضرورت ہے۔ کراچی اسپیچ اینڈ ڈیکلیمیشن سوسائٹی (کے ایس ڈی ایس) اور اقراء یونیورسٹی کے باہمی اشتراک سے ڈی ایچ اے گالف کلب میں ’’سب سے پہلے پاکستان‘‘ کے موضوع پر تقریری مقابلے میں پرویز مشرف نے کہا کہ ہم جب ملک سے باہر جاتے ہیں، تو لسانی اور صوبائی شناخت سے نہیں، بلکہ ملکی شناخت سے پہچانے جاتے ہیں، نوجوانوں کی ذمہ داری ہے کہ وہ ملکی وقار کو خاطر میں رکھتے ہوئے سب سے پہلے پاکستان کے بارے میں سوچیں، حکومت کی بھی ذمہ داری ہے کہ نوجوانوں کے مستقبل کیلئے کام کرے، اور زیادہ سے زیادہ مواقع ہونہار نوجوانوں کو فراہم کئے جائیں۔ انہوں نے کہا کہ اس طر ح کے مقابلے نوجوانوں کی تربیت اور کردارسازی میں اہم کردار ادا کرتے ہیں۔ سابق صدر نے مزید کہا کہ بجلی کا سب سے سستا ذریعہ پانی سے بجلی بنانے کا ہے، ہوا، سورج کی روشنی، کوئلے اور ایٹمی توانائی سے بھی سستی بجلی بنائی جا سکتی ہے، مگر حکومت تیل سے بجلی بنا رہی ہے، جو قومی خزانے پر بوجھ ہے۔

خبر کا کوڈ: 519701