اسلام ٹائمز - سید علی گیلانی کو دل کا دورہ

اسلام ٹائمز: ترجمان حریت کانفرنس ایاز اکبر کا کہنا ہے کہ سید علی گیلانی کو معمولی نوعیت کا دورہ پڑا ہے اور اللہ کا شکر ہے اب ان کی حالت خطرے سے باہر ہے اور وہ تیزی سے صحت یاب ہو رہے ہیں۔

اسلام ٹائمز۔ مقبوضہ کشمیر کے حریت رہنما سید علی گیلانی کو دل کا دورہ پڑنے کے بعد اسپتال میں داخل کر دیا گیا۔ بھارتی میڈیا کے مطابق بزرگ حریت رہنما سید علی گیلانی کو دل کا دورہ پڑا جس کے بعد انہیں دلی کے اسپتال لے جایا گیا ہے جہاں انہیں طبی امداد دی جارہی ہے۔ کشمیر میڈیا سیل کے مطابق حریت رہنما کو اچانک دل کا دورہ پڑنے پر ان کی صاحبزادی انہیں فوری طور پر رہائش گاہ کے قریب اسپتال لے گئیں جہاں انہیں آئی سی یو میں رکھا گیا ہے۔ حریت رہنما کے ترجمان ایاز اکبر کا کہنا ہے کہ سید علی گیلانی کو معمولی نوعیت کا دورہ پڑا ہے اور اللہ کا شکر ہے اب ان کی حالت خطرے سے باہر ہے اور وہ تیزی سے صحت یاب ہو رہے ہیں تاہم انہوں نے عوام سے اپیل کی ہے کہ ان کی صحت یابی کے لئے دعائیں کریں۔