QR Code

بھارت آج بھی پاکستان کو توڑنے کی کوششوں میں مصروف ہے، سراج الحق

4 Apr 2016 22:39

اسلام ٹائمز: احتجاجی ریلی سے خطاب کرتے ہوئے امیر جماعت اسلامی کا کہنا تھا کہ انڈیا نے ڈھاکہ، پونا، چٹاگانگ اور مشرقی پاکستان کے چپے چپے میں متحدہ پاکستان کو توڑنے کی سازش کی تھی اور آج بھی انڈیا پاکستان کو توڑنے کی کوششوں میں مصروف ہے۔

اسلام ٹائمز۔ امیر جماعت اسلامی پاکستان سینیٹر سراج الحق نے کہا ہے کہ سقوطِ غرناطہ کے بعد سقوطِ ڈھاکہ امت کے لیے ایک عظیم سانحہ ہے اور آج پوری ملت اسلامیہ کو، پاکستانی عوام کو اس سانحے کا رنج ہے۔ انڈیا نے ڈھاکہ، پونا، چٹاگانگ اور مشرقی پاکستان کے چپے چپے میں متحدہ پاکستان کو توڑنے کی سازش کی تھی اور آج بھی انڈیا پاکستان کو توڑنے کی کوششوں میں مصروف ہے۔ جب بنگلہ دیش میں پاکستان کو بچانے والے محب وطن بنگلہ دیشی رہنماوں کو پھانسیاں دی جاتی ہیں تو بحیثیت انسان اور مسلمان ہماری قومی، ملی غیرت اور حمیت جاگ اُٹھتی ہے، لیکن انتہائی افسوس کی بات ہے کہ ہمارے حکمرانوں کی غیرت سوئی ہوئی ہے۔ ان کے ضمیر سوئے ہوئے ہیں، یہ اپنے اُن بنگلہ دیشی مسلمان بھائیوں کے لیے کچھ کرنا نہیں چاہتے جنہوں نے اپنی جان، مال، عزت و آبرو متحدہ پاکستان پر نچھاور کردی۔ ایک انسان اور مسلمان ہونے کے ناطے اور جماعتِ اسلامی کے ذمہ دار ہونے کے ناطے میں نے مظلوم بنگلہ دیشی رہنماوں پر حسینہ واجد کے ظلم و ستم کی آواز ہر جگہ بلند کی۔

خبر کا کوڈ: 531575