QR Code

فاروق ستار کا بیان اندر کے چور کو چھپانے کی کوشش ہے، ترجمان ایم ڈبلیو ایم

6 Jun 2016 23:28

اسلام ٹائمز: ایم کیو ایم کے رہنما کے بیان پر ردعمل ظاہر کرتے ہوئے علامہ مختار امامی کا کہنا تھا کہ ہماری جدوجہد پرامن و خوشحال پاکستان کیلے ہے، جس میں محبت، رواداری اور بھائی چارہ ہو۔ جہاں نفرت، تشدد، بھتہ خوری اور قتل عام نہ ہو۔

اسلام ٹائمز۔ مجلس وحدت مسلمین کے مرکزی ترجمان مختار امامی نے متحدہ قومی موومنٹ کے رہنما جناب فاروق ستار کے دنیا نیوز کے پروگرام پہ تبصرہ کرتے ہوئے کہا کہ ایم ڈبلیو ایم کسی بھی سیاسی جماعت کے خلاف نہیں اور نہ ہی کسی جماعت کے خلاف پروپیگنڈے پر یقین رکھتی ہے۔ فاروق ستار کی مجلس وحدت پر بےبنیاد الزام تراشی دراصل اپنے اندر کے چور کو چھپانے کی کوشیش ہے۔ انہوں نے کہا کہ مجلس وحدت پاکستان کو قائد اعظم محمد علی جناح کے خوابوں کیمطابق انتہا پسندی اور دہشت گردی سے پاک دیکھنا چاہتی ہے۔ ہماری جدوجہد پرامن و خوشحال پاکستان کیلے ہے، جس میں محبت، رواداری اور بھائی چارہ ہو۔ جہاں نفرت، تشدد، بھتہ خوری اور قتل عام نہ ہو۔ ترجمان کا کہنا تھا کہ مجلس وحدت کے قائدین نے کئی بار ملاقاتوں کیلے آنیوالے متحدہ قومی موومنٹ کے رہنماوں کو واضح طور پر کہا تھا کہ وہ اپنی جماعت میں موجود شیعہ مخالف عناصر اور شیعہ قتل عام میں ملوث گروپس کو پارٹی سے نکالیں، جس پر ان رہنماوں نے رضامندی کا اظہار بھی کیا تھا۔ مجلس وحدت کے ترجمان کا کہنا تھا کہ شہید خرم ذکی کے جنازہ میں متحدہ مخالف نعرہ بازی کا مجلس وحدت سے کوئی تعلق نہیں اور انکی جماعت اسطرح کے کسی بھی اقدام کی حمایت نہیں کرتی۔

خبر کا کوڈ: 543825