QR Code

ضرب عضب سالمیت پاکستان کی جنگ ہے، شہداء کو سلام پیش کرتے ہیں، علامہ اقتدار حسین نقوی

6 Sep 2016 18:39

اسلام ٹائمز: ملتان سے جاری بیان کے مطابق ایم ڈبلیو ایم جنوبی پنجاب کے سیکرٹری جنرل کا کہنا تھا کہ پاک آرمی شہادت کے جذبے سے سرشار دنیا کی بہترین فوج ہے، جس پر قوم کو فخر ہے، افواج پاکستان جس طرح شمالی علاقہ جات میں دہشت گردوں کا خاتمہ کر رہی ہے اسی طرح پنجاب میں بھی کرے۔

اسلام ٹائمز۔ مجلس وحدت مسلمین جنوبی پجاب کے سیکرٹری جنرل علامہ سید اقتدار حسین نقوی نے یوم دفاع کے حوالے سے منعقدہ تقریب سے خطاب کرتے ہوئے کہا ہے کہ ضرب عضب پاکستان کی سلامتی کی جنگ ہے جسے پاک فوج کے جوانوں نے بڑی بہادری سے لڑا ہے اور شمالی علاقہ جات کو دہشت گردوں کے نرغے سے آزاد کرایا ہے۔ ضرب عضب میں شہید ہونے والے آفیسرز اور جوان قوم کا سرمایہ اور فخر ہے پوری قوم شہداء کو سلام پیش کرتی ہے۔ انہوں نے کہا پاک آرمی دنیا کی بہترین آرمی ہے جو جذبہ جہاد و شہادت سے سرشار ہے۔ یہی پاک فوج ہے جس نے 1965 ء میں دشمن کی اپنے سے کئی گنا بڑی آرمی کو شکست فاش دی۔ پاک آرمی نے جس طرح شمالی علاقہ جات میں آپریشن ضرب عضب کے ذریعے دہشت گردوں کا قلع قمع کیا ہے اسی طرح پنجاب میں بھی ضرب عضب شروع کرنے کی ضرورت ہے۔ کیونکہ پنجاب کے بیشتر علاقے دہشت گردوں کے بیس کیمپ کام کر رہے ہیں اور حکمران انکی سرپرستی کر رہے ہیں۔ جب تک پنجاب سے دہشت گردی کے اڈے ختم نہیں کئے جائیں گے اس وقت تک ملک سے دہشت گردی کا کامل خاتمہ ممکن نہیں ہے۔ آج پوری قوم پاک فوج کے ساتھ شانہ بشانہ کھڑی ہے اور جنرل راحیل شریف سے امیدیں وابستہ کئے ہوئے ہے کہ وہ ملکی سالمیت کا یہ مشن پایہ تکمیل تک پہنچائیں گے۔

خبر کا کوڈ: 565673