QR Code

مطالبات نہ مانے تو 27 دسمبر کے بعد نواز شریف کو لگ پتہ جائیگا کہ اپوزیشن کیا ہوتی ہے، بلاول کی کھلی دھمکی

13 Dec 2016 15:39

اسلام ٹائمز: کراچی میں پریس کانفرنس کرتے ہوئے چیئرمین پیپلز پارٹی نے کہا کہ تحریک چلانے کا کہا تو تحریک چلے گی، اگر حکومت نے مطالبات نہ مانے تو سڑکوں پر آنے کے علاوہ کوئی راستہ نہیں ہوگا، میاں صاحب، ہم آپ سے جواب لیں گے، تمام اپوزیشن جماعتوں کو سڑکوں پر آنے کی دعوت دیتا ہوں۔

اسلام ٹائمز۔ پاکستان پیپلز پارٹی کے چئیرمین بلاول بھٹو زرداری نے نواز حکومت کو دھمکی دی ہے کہ اگر میرے 4 مطالبات نہیں مانے تو تاریخی احتجاج کرونگا، بلاول بھٹو نے واضح کر دیا کہ 27 دسمبر کو لگ پتہ جائے گا کہ اپوزیشن کیا ہوتی ہے۔ تفصیلات کے مطابق بلاول بھٹو نے کراچی میں پیپلز پارٹی کے میڈیا سیل کا دورہ کیا۔ اس موقع پر ان کے ہمراہ اپوزیشن لیڈر خورشید شاہ، سابق وزیراعظم یوسف رضا گیلانی اور شیری رحمان بھی تھیں۔ بلاول نے کہا کہ ہم نے نواز حکومت سے 4 مطالبات کئے ہیں، پہلا مطالبہ، پارلیمان کی نیشنل سیکیورٹی کمیٹی کا قیام ہے، دوسرا مطالبہ، پانامہ اسکینڈل پر جمہوری احتساب ہے، تیسرا مطالبہ، سی پیک پر اے پی سی کے فیصلے پر عمل کروانے کا ہے اور چوتھا مطالبہ، ملک میں وزیر خارجہ مقرر کرنے کا ہے۔

بلاول بھٹو نے نواز حکومت کو مخاطب کرتے ہوئے کہا کہ تحریک چلانے کا کہا تو تحریک چلے گی۔ انہوں نے کہا کہ وزیراعظم نے خود کہا تھا کہ تحقیقات ان سے شروع کی جائیں۔ انہوں نے نے واضح کیا کہ 4 مطالبات ماننے کیلئے نواز حکومت سے درخواست نہیں کر رہے، اگر حکومت نے مطالبات نہ مانے تو سڑکوں پر آنے کے علاوہ کوئی راستہ نہیں ہوگا۔ چیئرمین پیپلز پارٹی نے وزیراعظم کو مخاطب کرتے ہوئے کہا کہ میاں صاحب، ہم آپ سے جواب لیں گے۔ بلاول بھٹو زرداری نے اپوزیشن جماعتوں کو مخاطب کرتے ہوئے کہا کہ تمام جماعتوں کو سڑکوں پر آنے کی دعوت دیتاہوں، پاکستان میں احتساب کا موجودہ نظام سب کے سامنے ہے۔ انھوں نے مزید بتایا کہ سندھ میں احتساب ہو رہا ہے۔

خبر کا کوڈ: 591352