QR Code

وزیروں کی فوج صرف شریف خاندان کی کرپشن بچانے میں لگی ہوئی، سردار سبطین خان

31 Mar 2017 17:46

میانوالی میں میڈیا سے گفتگو کرتے ہوئے پی ٹی آئی کے صوبائی رہنماء کا کہنا تھا کہ آئندہ عام انتخابات میں پانامہ ٹولے اور ان کے حواریوں کی ضمانتیں ضبط ہو جائیں گی، ملک میں جمہوریت کے نام پر بادشاہت مسلط کر دی گئی ہے۔

اسلام ٹائمز۔ ڈپٹی اپوزیشن لیڈر پنجاب اسمبلی سردار محمد سبطین خان نے میانوالی میں میڈیا سے گفتگو کرتے ہوئے کہا ہے کہ پانامہ کیس کا فیصلہ حکمرانوں کے تابوت میں آخری کیل ثابت ہوگا، پانامہ لیکس نے حکمرانوں کی کرپشن کو بے نقاب کر دیا، جس کی وجہ سے وہ بوکھلاہٹ کا شکار ہوچکے ہیں اور وزیروں کی فوج صرف شریف خاندان کی کرپشن بچانے میں لگی ہوئی ہے۔ انہوں نے کہا کہ تحریک انصاف واحد سیاسی جماعت ہے، جو ملک سے کرپشن، ناانصافی اور موروثی سیاست کے خلاف جدوجہد میں مصروف عمل ہے، موجودہ حکمرانوں نے ملک کا بیڑہ غرق کر دیا ہے، من پسند لوگوں کو نواز کر میرٹ کی دھجیاں اڑائی جا رہی ہیں۔ اُنھوں نے کہا کہ آئندہ عام انتخابات میں پانامہ ٹولے اور ان کے حواریوں کی ضمانتیں ضبط ہو جائیں گی، ملک میں جمہوریت کے نام پر بادشاہت مسلط کر دی گئی ہے، لوڈشیڈنگ ختم کرنے کے دعویداروں نے موسم گرما کے آغاز میں ہی چھوٹے شہروں میں ظالمانہ لوڈ شیڈنگ شروع کرکے غریب عوام کا سکھ چین چھین لیا ہے۔

خبر کا کوڈ: 623348