اسلام ٹائمز - صومالیہ، دارالحکومت میں خودکش حملے اور فائرنگ، 19 افراد ہلاک، 27 زخمی

صومالیہ، دارالحکومت میں خودکش حملے اور فائرنگ، 19 افراد ہلاک، 27 زخمی

موغادیشو میں ایک خودکش حملہ آور نے مشہور ہوٹل کے باہر بارود سے بھری گاڑی دھماکے سے اڑادی، جس کے بعد فوجی وردیوں میں ملبوس پانچ حملہ آوروں نے اسی علاقے میں پیزا ریسٹورینٹ میں گھس کر 20 افراد کو یرغمال بنالیا، سکیورٹی فورسز سے مسلح مقابلے میں تمام حملہ آور مارے گئے۔

اسلام ٹائمز۔ صومالیہ کے دارالحکومت موغادیشو میں ہوٹل اور پیزا ریسٹورینٹ پر خودکش حملے اور فائرنگ کے نتیجے میں 19 افراد ہلاک اور 27 افراد زخمی ہو گئے ہیں۔ غیر ملکی میڈیا رپورٹس کے مطابق صومالیہ کے دارالحکومت موغادیشو میں ایک خودکش حملہ آور نے مشہور ہوٹل کے باہر بارود سے بھری گاڑی دھماکے سے اڑادی، جس کے بعد فوجی وردیوں میں ملبوس پانچ حملہ آوروں نے اسی علاقے میں پیزا ریسٹورینٹ میں گھس کر 20 افراد کو یرغمال بنالیا۔ سکیورٹی فورسز اور حملہ آوروں کے درمیان کئی گھنٹوں تک فائرنگ کا تبادلہ جاری رہا، جس میں تمام پانچوں حملہ آور مارے گئے۔ موغادیشو کے ڈپٹی پولیس چیف نے واقعے میں ایک شامی شہری سمیت 19 افراد کے ہلاک جب کہ 27 کے زخمی ہونے کی تصدیق کردی ہے۔ انہوں نے کہا کہ سکیورٹی فورسز نے علاقے کا کنٹرول سنبھال لیا ہے تاہم کار بم حملے میں ہوٹل کی عمارت مکمل طور پر تباہ ہوگئی ہے۔ دوسری جانب صومالیہ میں سرگرم القاعدہ سے منسلک تنظیم الشباب نے حملے کی ذمہ داری قبول کرتے ہوئے سرکاری ملازمین اور فوجیوں کو ہلاک کرنے کا دعویٰ کیا ہے۔ واضح رہے کہ دو روز قبل امریکی جنگی طیاروں نے صومالیہ میں الشباب کے ٹھکانے پر میزائل حملہ کیا تھا جس میں 8 دہشتگرد ہلاک ہوئے تھے۔