QR Code

اپنی اڑھائی سالہ حکومتی کارکردگی کی رپورٹ عوام کے سامنے رکھنے کو تیار ہیں، نیشنل پارٹی

3 Jul 2017 12:45

پنجگور میں عوامی اجتماع سے خطاب کرتے ہوئے نیشنل پارٹی کے رہنماؤں کا کہنا تھا کہ گذشتہ 70 سال سے بلوچستان کی وزارت اعلٰی طاقتور سرداروں، نوابوں اور قبائلی شخصیات کے پاس رہی، جو کسی بھی قسم کی تبدیلی لانے میں ناکام رہیں، جبکہ نیشنل پارٹی کو یہ اعزاز حاصل ہے کہ ہم نے صرف اڑھائی سال کے عرصے میں صوبے کی مخدوش صورتحال پر قابو پایا۔

اسلام ٹائمز۔ نیشنل پارٹی کے جنرل سیکرٹری میر عبدالخالق بلوچ اور صوبائی وزیر صحت میر رحمت صالح بلوچ نے کہا ہے کہ نیشنل پارٹی بلوچستان کے قومی حقوق کی ضامن اور بلوچ قوم کی شناخت اور بقاء کی محافظ ہے۔ نیشنل پارٹی کو دیگر جماعتوں سے سبقت اس لئے حاصل ہے کہ نیشنل پارٹی نے کبھی عوام سے دھوکہ نہیں کیا ہے، بلکہ ہمیشہ اپنے عوام کے شانہ بشانہ رہ کر انکے دکھ درد میں شریک رہے ہیں۔ نیشنل پارٹی اپنے اڑھائی سالہ دور وزارت اعلٰی اور حکومت کا حصہ بننے کی تمام تر تفصیلات بلوچستان کے عوام کے سامنے پیش کرنے کیلئے تیار ہے۔ بلوچستان کی پارلیمانی تاریخ میں پہلی مرتبہ نیشنل پارٹی کو صرف اڑھائی سال کیلئے وزارت اعلٰی کا عہدہ دیا گیا۔ جنہوں نے اپنے اڑھائی سال کے مختصر وقت میں بلوچستان کی تباہ صورتحال پر قابو پاکر بلوچستان کے قومی اداروں کو بحال کرکے بلوچستان کو استحکام اور امن کی طرف راغب کیا۔ نیشنل پارٹی اور بلوچستان کے عوام ان سے سوال کرتے ہیں، جو 70 سال سے بلوچستان کے اقتدار کے منصب پر باری باری براجمان رہے ہیں۔ انہوں نے بلوچستان کے عوام کو کیا دیا ہے۔ کیا وہ اپنے دور کی بدامنی، جہالت، بے روزگاری، لوٹ مار، شاہراہوں پر قتل عام اور غنڈہ ٹیکس وصولی کو بھول گئے ہیں۔؟

خبر کا کوڈ: 650418