QR Code

رمضان المبارک کی آمد کے ساتھ ہی مہنگائی کی شرح میں ہوشربا اضافہ

19 May 2018 23:20

پی بی ایس کی جانب سے جاری کردہ اعداد و شمار کے مطابق گزشتہ ہفتے کیلے، ٹماٹر، آلو، پیاز، مرغی، ماچس، چائے کی پتی، نمک، چاول، گندم، گائے کے گوشت، انڈے، تازہ دودھ و دیگر کی قیمتوں میں اضافہ ہوا جبکہ صرف لہسن، گندم کے آٹے، دال ماش اور دال مونگ کی قیمتوں میں کمی ہوئی۔

اسلام ٹائمز۔ رمضان المبارک کی آمد کے ساتھ ہی مہنگائی کی شرح میں ہوشربا اضافہ ہوگیا۔ 17 مئی کو ختم ہونے والے ہفتے کے دوران حساس قیمتوں کے اشاریے (ایس پی آئی) کی بنیاد پر افراط ز کی شرح میں 0.93 فیصد کا نمایاں اضافہ ہوا۔ اس دوران 21 اشیائے ضروریہ کی قیمتوں میں اضافہ جبکہ صرف 4 اشیاء کی قیمتوں میں کمی ہوئی اور 28 اشیاء کے بھاؤ میں استحکام رہا۔ پاکستان بیورو شماریات (پی بی ایس) کی جانب سے جاری کردہ اعدادوشمار کے مطابق گزشتہ ہفتے کیلے، ٹماٹر، آلو، پیاز، مرغی، ماچس، چائے کی پتی، نمک، اروی ،چاول، گندم، گائے کے گوشت، انڈے، تازہ دودھ، ایل پی جی سلنڈر، گھی، سرخ مرچ، گڑ، چینی اور دال مسور کی قیمتوں میں اضافہ ہوا جبکہ صرف لہسن، گندم کے آٹے، دال ماش اور دال مونگ کی قیمتوں میں کمی ہوئی۔ گزشتہ روز کیلے 23 روپے فی درجن، ٹماٹر 6 روپے کلو، آلو 2 روپے کلو، پیاز 1 روپے، برائلر مرغی کی قیمت میں 7 روپے فی کلو کا اضافہ ہوا، چائے کی پتی کا 200 گرام پیکٹ 3 روپے، اری 6 چاول 1 روپے، 10 کلو گرام گندم 2 روپے، ہڈی والا گوشت 3 روپے، بکرے کا گوشت 5 روپے کلو، انڈے 1 روپے درجن، تازہ دودھ 1 روپے فی لیٹر، 11 کلو گرام ایل پی جی سلنڈر 4 روپے اور گھی 2 روپے کلو مہنگا ہوگیا جبکہ سرخ مرچ گڑ اور دالوں کی قیمتوں میں معمولی اضافہ ہوا۔ گزشتہ ہفتے لہسن 1 روپے فی کلو، 10 کلو گرام آٹے کا تھیلہ 2 روپے سستا ہوگیا جبکہ دال ماش اور دال مونگ کی قیمت میں معمولی کمی ریکارڈ کی گئی ہے۔

خبر کا کوڈ: 725900