QR Code

نگراں وزیراعظم کے طور پر اس بار ایک غیر متنازعہ اور قابل احترام انسان کا انتخاب کیا گیا ہے، فردوس شمیم نقوی

28 May 2018 23:14

ایک بیان میں پی ٹی آئی کراچی کے صدر نے کہا کہ نگراں وزیراعظم محض نام کا عہدہ نہیں ہے بلکہ ایک اہم ذمہ داری کا نام ہے، ایک حکومت اپنی مدت ختم ہونے پر پورے ملک کی ذمہ داری انہیں تفویض کرکے سبکدوش ہوگی اور دوسری حکومت ان کی نگرانی میں بنائی جائے گی۔

اسلام ٹائمز۔ پاکستان تحریک انصاف کراچی کے صدر فردوس شمیم نقوی نے کہا ہے کہ ہم جسٹس ریٹائرڈ ناصر الملک کو پاکستان کے نگراں وزیر اعظم بنائے جانے کے فیصلے کا خیر مقدم کرتے ہیں، پاکستان تحریک انصاف بھی اس فیصلے میں شریک رہی ہے اور ہم سمجھتے ہیں کہ نگراں وزیراعظم کے طور پر اس بار جس شخص کا انتخاب کیا گیا ہے، وہ ہر لحاظ سے ایک غیر متنازعہ اور قابل احترام انسان ہیں۔ یہ باتیں انہوں نے پارٹی سیکرٹریٹ ’’انصاف ہاؤس‘‘ کراچی سے جاری کردہ اپنے ایک خصوصی بیان میں کہی۔ انہوں نے مزید کہا کہ پی ٹی آئی کی رائے پہلے ہی دن سے یہی تھی کہ تمام سیاسی پارٹیاں نگراں وزیراعظم کے نام پر اتفاق کریں اور نگراں وزیراعظم اسے بنایا جائے جس کے فیصلوں پر کوئی اعتراض نہ کرسکے۔

انہوں نے کہا کہ نگراں وزیراعظم محض نام کا عہدہ نہیں ہے بلکہ ایک اہم ذمہ داری کا نام ہے، ایک حکومت اپنی مدت ختم ہونے پر پورے ملک کی ذمہ داری انہیں تفویض کرکے سبکدوش ہوگی اور دوسری حکومت ان کی نگرانی میں بنائی جائے گی۔ انہوں نے کہا کہ جسٹس ریٹائرڈ ناصر الملک بلاشبہ صاف و شفاف انتخابات کروانے کی اہلیت رکھتے ہیں، ان کا ماضی بدعنوانی سے داغدار نہیں اور وہ ایک اعلٰی کردار کے مالک ہیں، پاکستان تحریک انصاف جناب جسٹس ریٹائرڈ ناصر الملک کو پاکستان کا نگران وزیراعظم بنائے جانے پر تہہ دل سے مبارکباد پیش کرتی ہے اور ہم امید کرتے ہیں کہ پاکستان کی حکومت میں رہ کر جسٹس ریٹائرڈ ناصر الملک تاریخ ساز حکمرانی کی شاندار مثال قائم کریں گے۔

خبر کا کوڈ: 727986