QR Code
سندھ حکومت عیدالفطر پر سیکورٹی کا خاص خیال رکھے، فردوس شمیم نقوی
16 Jun 2018 03:12
اپنے ایک خصوصی بیان میں پی ٹی آئی رہنماؤں نے کہا کہ سندھ حکومت عیدالفطر کے موقع پر تفریحی مقامات پر سیکورٹی کا خاص خیال رکھے اور شہریوں کو چور، لٹیروں اور جیب کتروں سے بچایا جائے، کے الیکٹرک عیدالفطر کے موقع پر اعلانیہ و غیر اعلانیہ کسی قسم کی لوڈشیڈنگ نہ کرے۔
اسلام ٹائمز۔ پاکستان تحریک انصاف کراچی کے صدر فردوس شمیم نقوی اور پی ٹی آئی کراچی کے جنرل سیکریٹری و سندھ اسمبلی میں پی ٹی آئی کے سابق پارلیمانی لیڈر خرم شیر زمان نے پارٹی سیکرٹریٹ ’’انصاف ہاؤس‘‘ کراچی سے جاری کردہ اپنے ایک خصوصی بیان میں اہلیان کراچی کو عیدالفطر کی مبارکباد دیتے ہوئے کہا ہے کہ عید کے دن غریبوں کو بھی اپنی خوشیوں میں یاد رکھیں اور انہیں عید کی خوشیوں میں شریک کرنے کی بھرپور کوشش کریں۔ انہوں نے مزید کہا کہ سندھ حکومت عیدالفطر کے موقع پر تفریحی مقامات پر سیکورٹی کا خاص خیال رکھے اور شہریوں کو چور، لٹیروں اور جیب کتروں سے بچایا جائے، کے الیکٹرک عیدالفطر کے موقع پر اعلانیہ و غیر اعلانیہ کسی قسم کی لوڈشیڈنگ نہ کرے۔
فردوس نقوی نے کہا کہ واٹر بورڈ پانی کے معاملات درست رکھے تاکہ شہریوں کو پانی اور بجلی کی فراہمی عید کے موقع پر بلاتعطل جاری رہے۔ انہوں نے کہا کہ پاکستان تحریک انصاف کراچی کی طرف سے ہم اہلیان کراچی کو عید کی بھرپور مبارکباد پیش کرتے ہیں، لوگ جوق در جوق مساجد میں ایک دوسرے سے گلے مل کر قومی یکجہتی کا اظہار کریں، پولیس اور قانون نافذ کرنے والے اداروں کو بھی چاہیئے کہ شہریوں کی جان و مال کی حفاظت یقینی بنانے کے لئے ہر ممکن اقدامات کریں۔
خبر کا کوڈ: 731861