اسلام ٹائمز - محمود خان وزیرِاعلٰی ہاؤس میں رہائش اختیار نہیں کرینگے اور نہ ہی پروٹوکول لینگے، شوکت یوسفزئی

محمود خان وزیرِاعلٰی ہاؤس میں رہائش اختیار نہیں کرینگے اور نہ ہی پروٹوکول لینگے، شوکت یوسفزئی

ترجمان کے پی حکومت کا کہنا تھا کہ وزیرِاعلٰی ہاؤس میں سادگی اختیار کی جائیگی اور وزیرِاعلٰی کے زیرِ استعمال جتنی گاڑیاں ہیں انکی تعداد میں کمی لائی جائیگی۔ محمود خان صبح 9 بجے دفتر میں اپنی حاضری یقینی بنائینگے۔ ترجمان کے مطابق وزیرِاعلٰی محمود خان دوپہر 2 سے سہ پہر 5 بجے تک اسمبلی کے ارکان سے ملاقاتیں کرینگے اور عید کا پہلا دن پشاور میں گزاریں گے۔

اسلام ٹائمز۔ خیبر پختونخوا حکومت کے ترجمان شوکت یوسف زئی نے کہا ہے کہ محمود خان وزیرِاعلٰی ہاؤس میں رہائش اختیار نہیں کریں گے، نہ ہی پروٹوکول لیں گے۔ تفصیلات کے مطابق ترجمان کے پی حکومت کا کہنا ہے کہ وزیرِاعلٰی محمود خان نے فیصلہ کیا ہے کہ ان کی نقل و حرکت کے دوران سڑکیں بند نہیں ہوں گی، وہ وزیرِاعلٰی ہاؤس میں بھی نہیں رہیں گے۔ میڈیا سے گفتگو کرتے ہوئے ترجمان کا کہنا تھا کہ خیبر پختونخوا کے وزیرِاعلٰی ہاؤس میں سادگی اختیار کی جائے گی اور وزیرِاعلٰی کے زیرِ استعمال جتنی گاڑیاں ہیں ان کی تعداد میں کمی لائی جائے گی۔ ترجمان شوکت یوسفزئی نے وزیرِ اعلٰی کے شیڈول کے حوالے سے میڈیا کو بتایا کہ محمود خان صبح 9 بجے دفتر میں اپنی حاضری یقینی بنائیں گے۔ ترجمان کے مطابق وزیرِاعلٰی محمود خان دوپہر 2 سے سہ پہر 5 بجے تک اسمبلی کے ارکان سے ملاقاتیں کریں گے اور عید کا پہلا دن پشاور میں گزاریں گے۔ واضح رہے کہ وزیراعلٰی خیبر پختونخوا محمود خان نے 17 اگست کو اپنے عہدے کا حلف اُٹھایا، کے پی کی وزارتِ اعلٰی کیلئے ان کا مقابلہ متحدہ مجلس عمل کے میاں نثار گل سے تھا۔ تحریکِ انصاف کے محمود خان نے پولنگ میں میاں نثار گل کے 33 ووٹوں کے مقابلے میں 77 ووٹ حاصل کئے اور کے پی کے وزیرِاعلٰی منتخب ہوئے۔