QR Code

ہم نئی ایم کیو ایم بنائیں گے، متحدہ قومی کونسل بنانے کا جلد اعلان کروں گا، فاروق ستار

7 Jan 2019 15:10

کراچی میں میڈیا سے بات کرتے ہوئے سابق رہنما ایم کیو ایم کا کہنا تھا کہ چاہے جتنے سیاسی مقدمات بنائیں لیکن ان کو چلایا جائے، جس طرح عام انتخابات میں دھاندلی ہوئی اس سے بانی ایم کیو ایم کی سیاست کو دوبارہ پھلنے پھولنے کا موقع ملے گا، ادارے فیصلہ کر لیں اس طرز عمل سے کیا بانی ایم کیو ایم کو واپسی دوبارہ لانا ہے۔

اسلام ٹائمز۔ متحدہ قومی موومنٹ کے سابق رہنما فاروق ستار کا کہنا ہے کہ متحدہ قومی کاؤنسل بنانے کا بہت جلد اعلان کروں گا۔ کراچی میں میڈیا سے بات کرتے ہوئے فاروق ستار کا کہنا تھا کہ انہیں مقدمات کی تاریخیں مل رہی ہیں لیکن کیس نہیں چل رہا، چاہے جتنے سیاسی مقدمات بنائیں لیکن ان کو چلایا جائے، جس طرح عام انتخابات میں دھاندلی ہوئی اس سے بانی ایم کیو ایم کی سیاست کو دوبارہ پھلنے پھولنے کا موقع ملے گا، ادارے فیصلہ کر لیں اس طرز عمل سے کیا بانی ایم کیو ایم کو واپسی دوبارہ لانا ہے۔ انہوں نے کہا کہ علی رضا عابدی کے قتل سے خوف و ہراس پیدا کیا گیا، ہمیں قانون نافذ کرنے والے ادارے آمدورفت سے منع کرتے ہیں، حکومت اور قانون نافذ کرنے والوں کی ذمہ داری یہاں پوری نہیں ہوتی، سیاسی لیڈر گھر میں کیسے بیٹھ سکتا ہے۔ فاروق ستار نے کہا کہ پی ٹی آئی کے حکومت میں آتے ہی کراچی کو نظر انداز کیا جارہا ہے، ایک بات یاد رکھیں کراچی چلتا ہے تو ملک چلتا ہے، کراچی بیٹھ گیا تو معیشت بیٹھ جائے گی، عمران خان سے کہتا ہوں کراچی سمیت پورے سندھ کو دیکھیں، کراچی میں بجلی پانی ٹرانسپورٹ کے مسائل کو حل کریں، کراچی کو چھوڑ کر پورے پاکستان میں پبلک ٹرانسپورٹ ہے۔

خبر کا کوڈ: 770723