QR Code

بیرون ملک پاکستانیوں کی جیل میں ہلاکتوں کی ذمہ دار وزارت داخلہ ہے، سپریم کورٹ

4 Mar 2019 16:57

عدالت نے ایڈیشنل اٹارنی جنرل کو کہا کہ سیکرٹری داخلہ کو 10 منٹ میں عدالت آنے کا حکم دے رہے ہیں، اگر 10 منٹ میں پیش نہ ہوئے تو توہین عدالت کا نوٹس اور وارنٹ جاری کریں گے۔ سپریم کورٹ کے طلب کرنے پر سیکرٹری داخلہ عدالت میں پیش ہوئے جس پر عدالت نے پہلے پیش نا ہونے پر ان کی سرزنش کی۔

اسلام ٹائمز۔ سپریم کورٹ نے بیرون ملک پاکستانی قیدیوں کی واپسی سے متعلق رپورٹ طلب کرلی جبکہ عدالت نے کہا کہ بیرون ملک پاکستانیوں کی جیل میں ہلاکتوں کی ذمہ دار وزارت داخلہ ہے۔ سپریم کورٹ میں برطانیہ سے قیدیوں کی پاکستان منتقلی سے متعلق کیس کی سماعت ہوئی، جس میں سیکرٹری داخلہ کے پیش نہ ہونے پر عدالت نے شدید برہمی کا اظہار کیا۔ جسٹس اعجاز الاحسن نے ریمارکس دیئے کہ سیکرٹری داخلہ تو خود کو شہنشاہ سمجھتے ہیں، آج آخری موقع کے باوجود پیش نہیں ہوئے، سیکرٹری داخلہ کیوں پیش نہیں ہو رہے؟

عدالت نے ایڈیشنل اٹارنی جنرل کو کہا کہ سیکرٹری داخلہ کو 10 منٹ میں عدالت آنے کا حکم دے رہے ہیں، اگر 10 منٹ میں پیش نہ ہوئے تو توہین عدالت کا نوٹس اور وارنٹ جاری کریں گے۔ سپریم کورٹ کے طلب کرنے پر سیکرٹری داخلہ عدالت میں پیش ہوئے جس پر عدالت نے پہلے پیش نا ہونے پر ان کی سرزنش کی۔ جسٹس عظمت سعید نے سیکرٹری داخلہ سے استفسار کیا کہ بیرون ملک جیلوں میں قید پاکستانیوں کا کیا کرنا ہے؟ کیا بیرون ملک سے پاکستانیوں کی لاشیں ہی واپس لانی ہیں، بیرون ملک پاکستانیوں کی جیل میں ہلاکتوں کی ذمہ دار وزارت داخلہ ہے۔ معزز جج نے مزید ریمارکس دیئے کہ سیکرٹری داخلہ کوئی اور کام دیکھیں، وزارت داخلہ چلانا ان کے بس میں نہیں، ایسے سیکرٹری داخلہ سے پاکستانی محفوظ نہیں ہیں۔

خبر کا کوڈ: 781292