QR Code

عمر عبداللہ نے این آئی اے کو پہلے کیوں نہیں روکا، سجاد لون

30 Mar 2019 15:30

پیپلز کانفرنس کے چیئرمین نے کہا کہ عمر عبداللہ افضل گورو کی پھانسی کو روکنے یا کم از کم انکی لاش کو کشمیر واپس لانے کے لئے اپنی طاقت کا استعمال کرسکتے تھے۔

اسلام ٹائمز۔ جموں و کشمیر پیپلز کانفرنس کے چیئرمین سجاد غنی لون نے این آئی اے کے ذریعہ کشمیریوں کو خوفزدہ کرنے پر روک لگانے کے حوالے سے عمر عبداللہ کے بیان پر تنقید کی۔ انہوں نے کہا کہ اس ایجنسی کو نیشنل کانفرنس کے اتحادی پارٹنر نے ہی قائم کیا تھا جب ڈاکٹر عبداللہ کابینہ کے رکن تھے۔ عمر عبداللہ کے اس بیان جس میں انہوں نے این آئی اے ذریعہ کشمیریوں کو خوفزدہ نہ کرنے دینے کی بات کہی، سجاد لون نے اس سے متعلق سوال کا جواب دیتے ہوئے کہا کہ مجھے حیرانگی اس بات پر ہے کہ عمر عبد اللہ جھوٹ کیسے بولتے ہیں۔ بطور ادارہ این آئی اے کا قیام کانگریس کے ہاتھوں عمل میں آیا جب نیشنل کانفرنس اور کانگریس کا آپس میں اتحاد تھا۔

انہوں نے کہا کہ ڈاکٹر فاروق عبداللہ اس وقت کابینہ کے رکن تھے۔ سجاد لون نے کہا کہ مجھے ڈاکٹر فاروق عبداللہ یا عمر عبداللہ جو کہ اس وقت وزیراعلٰی تھے، کا ایک بھی ایسا بیان یاد نہیں ہے جس میں انہوں نے این آئی اے کو دئے گئے وسیع اختیارات پر تشویش ظاہر کی ہو۔ سجاد لون نے مزید کہا کہ عمر عبداللہ ہمیں یہ بتائیں کہ وہ خوفزدگی روک سکتے ہیں یا ان کے پاس طاقت نہیں ہے۔ انہوں نے کہا کہ اگر وہ واقعی بہت طاقتور ہیں تو پھر انہوں نے ماضی میں ان طاقتوں کا استعمال کیوں نہیں کیا۔ سجاد لون نے کہا کہ عمر عبداللہ افضل گورو کی پھانسی کو روکنے یا کم از کم ان کی لاش کو کشمیر واپس لانے کے لئے اپنی طاقت کا استعمال کرسکتے تھے۔

خبر کا کوڈ: 786005