اسلام ٹائمز۔ ادھم پور جموں پارلیمانی حلقہ انتخاب کے امیدوار چوہدری لال سنگھ نے بی جے پی پر پورے ملک میں لوگوں کو دھوکہ دینے کا الزام عائد کرتے ہوئے کہا کہ ادھم پور سے بھاجپا رکن پارلیمان ڈاکٹر جتیندر سنگھ نے اس پارلیمانی حلقے میں زمینی سطح پر کوئی کام نہیں کیا ہے۔ لال سنگھ جو بی جے پی کے رکن اسمبلی و ریاستی وزیر رہ چکے ہیں، نے نامہ نگاروں کو بتایا کہ جتیندر سنگھ کو یہ پتہ نہیں کہ ان کے گھر کے ووٹ کہاں ہیں۔؟ انہوں نے کہا کہ ہماری ایک نئی جماعت ہے لیکن ہمیں ہر ایک جگہ امید سے زیادہ لوگوں کا تعاون حاصل ہوا۔ انہوں نے کہا کہ اس کے برعکس ڈاکٹر جتیندر جہاں بھی گئے وہاں لوگوں نے انہیں گھیرا، ان سے سوالات کئے، بہت سے جگہوں سے انہیں بھاگنا پڑا۔

چوہدری لال سنگھ نے کہا کہ بی جے پی کے پاس کوئی لائق امیدوار نہیں ہے۔ انہوں نے کہا کہ یہ لوگ اتنے بے شرم ہیں کہ انہوں نے ایک جعلی فیس بک کھاتہ کھولا اور اس میں لکھا کہ لال سنگھ نے واپس بی جے پی جوائن کرلی ہے، اس لئے آپ لوگ بی جے پی کے لئے ووٹ کریں۔ انہوں نے کہا کہ بی جے پی نے تو پورے ملک کو دھوکہ دیا ہے، ادھم پور پارلیمانی حلقے میں گذشتہ پانچ برس کے دوران کسی قسم کے ترقیاتی کام نہیں ہوئے۔ صرف کاغذی گھوڑے دوڑائے گئے۔ لال سنگھ نے ریاست جموں و کشمیر کو تین حصوں میں تقسیم کرنے کی وکالت کرتے ہوئے کہا کہ میں نے ہر بار واضح الفاظ میں کہا ہے کہ جموں و کشمیر کو تین حصوں میں تقسیم کیا جائے۔

اسلام ٹائمز