QR Code
سکردو، خواتین کے احتجاج کے موقع پر پولیس اور وکلاء میں تصادم
23 Apr 2019 23:43
پولیس نے سکیورٹی اہلکاروں پر ہاتھ اٹھانے اور سرکاری دفتر کے دروازے کو لات مارنے کے الزام میں کئی وکلاء کیخلاف انسداد دہشتگردی ایکٹ کے تحت مقدمہ درج کر لیا۔
اسلام ٹائمز۔ پانی کی بندش پر خواتین کے احتجاج کے موقع پر پولیس اور وکلاء میں تصادم، ایک دوسرے پر لاتوں اور مکوں کا آزادانہ استعمال کیا گیا، پولیس نے کئی وکلاء کیخلاف انسداد دہشتگردی ایکٹ کے تحت مقدمہ درج کر کے گرفتاریاں شروع کر دیں۔ منگل کے روز حمید گڑھ چوک پر درجن بھر خواتین پانی کی بندش کے خلاف احتجاج کر رہی تھیں، اسی دوران آصف ناجی ایڈوکیٹ خواتین کے پاس آئے اور انہیں ساتھ لے کر کمشنر آفس کے سامنے پہنچے اور کمشنر کے دفتر کے اندر جانے کی کوشش کی تو انہیں بتایا گیا کہ اندر میٹنگ چل رہی ہے، لہٰذا وہ اندر نہیں جاسکتے، اسی دوران آصف ناجی ایڈووکیٹ اور کمشنر کے گن مین کے مابین جھگڑا ہو گیا، بعد ازاں آصف ایڈووکیٹ نے دیگر وکلاء کو بلا لیا، جس کے بعد پولیس اور وکلاء کے درمیان لڑائی شروع ہوئی، جھڑپ کئی گھنٹے جاری رہی، پولیس نے کمشنر آفس کے دروازے کو لات مارنے اور سکیورٹی فورسز پر ہاتھ اٹھانے کے الزام میں آصف ناجی ایڈووکیٹ، شاکر ریحان ایڈووکیٹ، ذوالفقار ایڈووکیٹ سمیت کئی نامعلوم وکلاء کے خلاف انسداد دہشتگردی ایکٹ کے تحت مقدمہ درج کر لیا ہے اور آصف ایڈووکیٹ کو گرفتار کر کے باقی وکلاء کی تلاش شروع کردی ہے۔
خبر کا کوڈ: 790291