اسلام ٹائمز - سپریم کورٹ کے فیصلے پر عملدرآمد نہ ہوا تو عوام کو سڑکوں پر لائیں گے، متحدہ اپوزیشن جی بی

سپریم کورٹ کے فیصلے پر عملدرآمد نہ ہوا تو عوام کو سڑکوں پر لائیں گے، متحدہ اپوزیشن جی بی

اپنے ایک مشترکہ بیان میں متحدہ اپوزیشن کا کہنا تھا کہ سوچی سمجھی سازش کے تحت آرڈر 2018ء کے تحت سمریاں بھیجی جا رہی ہیں، سپریم کورٹ نوٹس لے۔

اسلام ٹائمز۔ متحدہ اپوزیشن گلگت بلتستان اسمبلی کیپٹن (ر) محمد شفیع، جاوید حسین، نواز خان ناجی، عمران ندیم، کاچو امتیاز، حاجی رضوان اور بی بی سلیمہ نے اپنے ایک مشترکہ بیان میں کہا ہے کہ سپریم کورٹ کے لارجر بینچ کے فیصلے کے بعد آرڈر 2018ء کالعدم ہو چکا ہے، گلگت بلتستان میں اب تک سپریم کورٹ کے فیصلے پر عملدرآمد نہ ہونا عدالتی حکم کی توہین ہے۔ سپریم کورٹ آف پاکستان جی بی میں اپنے فیصلے پر عملدرآمد کے لئے تمام ریاستی اداروں کو احکامات بھی جاری کرے، سوچی سمجھی سازش کے تحت آرڈر 2018ء کے تحت سمریاں بھیجی جا رہی ہیں۔ سپریم کورٹ کے فیصلے پر عملدرآمد نہیں ہوا تو عوام کو سڑکوں پر لائینگے۔ انہوں نے مذید کہا ہے کہ وزیر اعلی اور ان کی کابینہ کی جانب سے سپریم کورٹ کے فیصلے پر عملدرآمد نہ کرنا اور آرڈر 2018ء کے تحت سمریاں بھیجنا عدالتی فیصلے کی توہین ہے۔ سپریم کورٹ کو چاہیئے کہ وہ اس سلسلے میں گلگت بلتستان میں موجود تمام ریاستی اداروں کو احکامات جاری کرے۔ ہمارے صبر کا امتحان نہ لیا جائے، عدالتی فیصلے کی روشنی میں فوراً جی بی میں آرڈر 2019ء کو نافذ کیا جائے اور تمام سمریاں اور فیصلے آرڈ 2019ء کے تحت کیے جائیں۔