QR Code
آغا علی رضوی کی زیر صدارت سکردو حلقہ دو ضلع بناؤ تحریک کا اہم اجلاس
22 May 2019 20:42
اجلاس میں گورنر، وزیر اعلیٰ، فورس کمانڈر اور چیف سیکرٹری سے مطالبہ کیا گیا کہ وہ سکردو حلقہ دو کو ضلع بنانے میں کردار ادا کریں اور انتظامی حوالے سے اس حلقے کے ساتھ ہونے والی ناانصافیوں کا ازالہ کریں۔
اسلام ٹائمز۔ سکردو حلقہ 2 ضلع بناؤ تحریک کا گمبہ سکردو میں تحریک کے بانی و سرپرست اعلی سید علی رضوی و امام جمعہ و الجماعت گمبہ سکردو سید احمد شاہ الحسینی کی صدارت میں 4 گھنٹے کا طویل اجلاس منعقد ہوا، جسمیں حلقہ بھر سے عمائدین نے شرکت کی۔ اجلاس میں مختلف سیاسی، مذہبی جماعتوں کے قائدین وکلاء کے علاوہ نوجوانوں کی بھی بڑی تعداد نے شرکت کی۔ اجلاس میں سکردو حلقہ نمبر 2 کے ساتھ ہونے والی ناانصافیوں پر گفت و شنید کی گئی اور متفقہ طور پر ایک قرارداد منظور کی گئی جس میں حکومت سے مطالبہ کیا گیا کہ سکردو حلقہ 2 کو فوری طور پر ضلع بنا کر اس کو تین حلقوں میں تقسیم کیا جائے اور انتظامی حوالے سے اس حلقے کے ساتھ ہونے والی زیادتیوں کا ازالہ کیا جائے۔ گورنر، وزیر اعلی، فورس کمانڈر، چیف سکریٹری سکردو حلقہ نمبر 2 کے عوام کے احساسات کا خیال رکھتے ہوئے حلقہ 2 کو فوری طور پر ضلع کا درجہ دینے کا اعلان کریں۔ قرارداد میں کہا گیا کہ داریل، تانگیر، یاسین، گوپس اور روندو کو ضلع بنانا خوش آئند ہے، ہم حکومت کے اس فیصلے کا خیر مقدم کرتے ہیں مگر ساتھ ساتھ سکردو حلقہ نمبر 2 کی بڑھتی ہوئی آبادی کے پیش نظر اس کو بھی فوری طور پر ضلع بنایا جائے۔
خبر کا کوڈ: 795776