QR Code
کراچی میں شدید گرمی کی لہر جاری، لوڈشیڈنگ سے شہریوں کی زندگی اجیرن
14 Jun 2019 18:33
کے الیکٹرک نے عیدالفطر کی تعطیلات کے فوراً بعد کراچی میں غیر اعلانیہ طور پر لوڈشیڈنگ کے دورانیے میں اضافہ کر دیا۔
اسلام ٹائمز۔ شہر قائد آج بھی شدید گرمی کی لپیٹ میں ہے، گرمی کی شدت 15 جون تک برقرار رہے گی، دوسری جانب شدید گرمی کے عالم میں لوڈ شیڈنگ نے شہریوں کی زندگی اجیرن کر دی۔ تفصیلات کے مطابق کراچی پچھلے کئی روز سے شدید گرمی کی لپیٹ میں ہے، گرمی کا یہ دورانیہ مزید دو روز تک جاری رہے گا۔ محکمہ موسمیات کی جانب سے ہیٹ ویو الرٹ پہلے ہی جاری کیا جا چکا ہے۔ محکمہ موسمیات کے مطابق شہر میں دو روز موسم گرم اور مرطوب رہے گا اور 15 جون تک شہر میں گرمی شدت کی برقرار رہے گی، تاہم 16 جون سے گرمی کی شدت میں کمی واقع ہوگی۔ دوسری جانب کے الیکٹرک نے عیدالفطر کی تعطیلات کے فوراً بعد کراچی میں غیر اعلانیہ طور پر لوڈشیڈنگ کے دورانیے میں اضافہ کر دیا، گنجان آباد رہائشی علاقوں میں لوڈشیڈنگ کا دورانیہ 8 سے 12 گھنٹے تک پہنچ گیا، بیشتر علاقوں میں 2 سے ڈھائی گھنٹے کی لوڈشیڈنگ کی جا رہی ہے اور 24 گھنٹے میں مجموعی طور پر 3 سے 4 بار بجلی کی فراہمی معطل کی جا رہی ہے۔
خبر کا کوڈ: 799480