QR Code

کراچی میں عوامی مقامات پر مویشی منڈیاں لگانے پر پابندی عائد

23 Jul 2019 23:56

صوبائی محکمہ داخلہ کے نوٹیفکیشن میں بلدیات، پولیس اور تمام ڈپٹی کمشنرز سمیت دیگر اداروں کو احکامات جاری کر دیئے گئے۔

اسلام ٹائمز۔ سندھ حکومت نے کراچی میں عوامی مقامات پر عید کے دوران مویشی منڈیاں لگانے پر پابندی عائد کر دی ہے۔ حکومتِ سندھ نے صوبے بھر میں مویشی منڈیاں لگانے کیلئے طریقہ کار جاری کرتے ہوئے صوبائی محکمہ داخلہ کے نوٹیفکیشن میں بلدیات، پولیس اور تمام ڈپٹی کمشنرز سمیت دیگر اداروں کو احکامات جاری کیے ہیں۔ نوٹیفکیشن میں کہا گیا ہے کہ عوامی مقامات، پارکوں، گلیوں اور شاہراہوں پر مویشی منڈیاں لگانے پر پابندی عائد ہوگی، جبکہ خرید و فروخت کیلئے منڈی لگانے کیلئے این او سی لینی ہوگی۔ نوٹیفکیشن میں کہا گیا ہے کہ صفائی ستھرائی، سیوریج، پانی، روشنی اور سیکیورٹی کا انتظام لازمی ہے، جبکہ منڈی میں جانوروں کے معالج کا ہونا بھی ضروری ہوگا۔

خبر کا کوڈ: 806677