اسلام ٹائمز - کابل میں شادی کی تقریب میں ہولناک دھماکہ بربریت کی انتہاء ہے، علامہ وحید کاظمی

کابل میں شادی کی تقریب میں ہولناک دھماکہ بربریت کی انتہاء ہے، علامہ وحید کاظمی

پشاور سے جاری اپنے ایک بیان میں ایم ڈبلیو ایم خیبر پختونخوا کے سربراہ کا کہنا تھا کہ کابل میں ہونیوالے اس دھماکہ کی ذمہ داری میڈیا رپورٹس کے مطابق داعش نے قبول کی ہے، جو اس بات کی علامت ہے کہ داعش کا خطرہ اب بھی موجود ہے۔

اسلام ٹائمز۔ مجلس وحدت مسلمین خیبر پختونخوا کے سیکرٹری جنرل علامہ وحید عباس کاظمی نے کہا ہے کہ کابل میں شادی کی تقریب میں ہولناک دھماکہ ظلم و بربریت کی انتہاء ہے، انسانیت سے عاری دہشتگردوں نے اس کارروائی سے ثابت کر دیا ہے کہ افغانستان اب بھی دہشتگردوں کے نرغے میں ہے۔ پشاور سے جاری ایک بیان میں ان کا کہنا تھا کہ کابل میں ہونے والے اس دھماکہ کی ذمہ داری میڈیا رپورٹس کے مطابق داعش نے قبول کی ہے، جو اس بات کی علامت ہے کہ داعش کا خطرہ اب بھی موجود ہے۔

امریکہ دو دہائیاں افغانستان میں گزارنے کے باوجود امن قائم نہیں کرسکا، کیونکہ اس کا مقصد افغانستان میں امن قائم کرنا نہیں، بلکہ خطہ میں اپنی اجارہ داری قائم رکھنا ہے۔ پاکستانی قوم اس سانحہ پر افسردہ ہے، افغان حکومت کو چاہیئے کہ وہ عوام کو تحفظ فراہم کرے، پاکستان اور افغانستان کی حکومتوں کو دہشتگردی کیخلاف مشترکہ کوششیں کرنے کی ضرورت ہے، تاکہ دہشتگردوں کا مکمل طور پر قلع قمع ہوسکے۔ انہوں نے کہا کہ ہماری دلی ہمدردیاں اس سانحہ میں متاثر ہونے والے خاندانوں کیساتھ ہیں۔