اسلام ٹائمز - بلاول بھٹو کے حلقہ انتخاب رتو ڈیرو میں ایڈز کے مریضوں کی تعداد ایک ہزار سے تجاوز

بلاول بھٹو کے حلقہ انتخاب رتو ڈیرو میں ایڈز کے مریضوں کی تعداد ایک ہزار سے تجاوز

ہر گزرتے دن کے ساتھ مریضوں کی تعداد میں اضافے اور بچوں کی بڑی تعداد کے باعث وفاق و سندھ حکومت سمیت صحت کے عالمی اداروں میں بھی تشویش کی لہر دوڑ گئی۔

اسلام ٹائمز۔ اندرون سندھ کی تحصیل رتوڈیرو کے اسپتال میں بلڈ اسکریننگ کا عمل 3 ماہ بعد بھی جاری ہے۔ جن میں ایچ آئی وی پازیٹو افراد کی تعداد 1 ہزار دو ہو چکی ہے۔ تفصیلات کے مطابق چیئرمین پیپلز پارٹی بلاول بھٹو زرداری کے حلقہ انتخاب تحصیل رتوڈیرو کے اسپتال میں بلڈ اسکریننگ کا عمل 3ماہ بعد بھی جاری ہے۔ جس میں اب تک 33 ہزار 653 افراد کی اسکریننگ کی جا چکی ہے۔ جن میں ایچ آئی وی پازیٹو افراد کی تعداد 1 ہزار دو ہو چکی ہے، جن میں 820 بچے شامل ہیں۔

25 اپریل 2019ء کو رتوڈیرو کے پرائیویٹ ڈاکٹر عمران اکبر عاربانی نے اپنی نجی کلینک پر 12 بچے ایچ آئی وی پازیٹو ہونے کا دعویٰ کیا، جس پر سندھ ایڈز کنٹرول پروگرام اور حکومت سندھ نے پہلے تو سستی سے کام لیا، لیکن دن بہ دن ایچ آئی وی مریضوں کی تعداد میں اضافے کے بعد متعلقہ حکام حوش میں آئے اور تحصیل اسپتال میں جنرل بلڈ اسکریننگ کا عمل شروع کیا۔ ہر گزرتے دن کے ساتھ مریضوں کی تعداد میں اضافے اور بچوں کی بڑی تعداد کے باعث وفاق و سندھ حکومت سمیت صحت کے عالمی اداروں میں بھی تشویش کی لہر دوڑ گئی۔