QR Code

گلگت بلتستان کے 5 اضلاع میں تشنج سے بچاؤ کی 6 روزہ مہم 30 نومبر سے شروع ہوگی

24 Nov 2019 20:07

مہم کے دوران گلگت، سکردو، استور، دیامر اور کھرمنگ میں 15 سے 49 سال کی 2 لاکھ 30 ہزار 764 خواتین کو تشنج سے بچاؤ کے ٹیکے لگائے جائیں گے۔

اسلام ٹائمز۔ گلگت بلتستان کے 5 اضلاع میں تشنج سے بچاؤ کی 6 روزہ مہم 30 نومبر سے شروع ہوگی۔ مہم کے دوران 15 سے 49 سال کی 2 لاکھ 30 ہزار 764 خواتین کو تشنج سے بچاؤ کے ٹیکے لگائے جائیں گے۔ حفاظتی پروگرام برائے ٹیکہ جات کے ڈائریکٹر ڈاکٹر شکیل احمد نے کہا ہے کہ 30 نومبر سے 6 دسمبر تک تشنج سے بچاؤ کی مہم منعقد ہوگی، اس مہم کے دوران پہلے مرحلے میں جی بی کے پانچ اضلاع گلگت، استور، دیامر، سکردو اور کھر منگ میں 49 سال تک کی دو لاکھ تیس ہزار سے زائد خواتین کو تشنج سے بچاؤ کے حفاظتی ٹیکے لگائے جائیں گے، اس مقصد کے لئے تمام تیاریاں مکمل کر لی گئی ہیں اور سٹاف کو تربیت بھی دی گئی ہے۔ تشنج سے بچاؤ کی مہم کے لئے 261 ٹیمیں تشکیل دی گئی ہیں جو کہ مختلف علاقوں میں الگ الگ مقامات پر خواتین کو ٹیکے لگائیں گی۔ ڈاکٹر شکیل احمد نے عوام سے اپیل کی ہے کہ تشنج سے بچاؤ کی مہم کو کامیاب بنانے کے لئے محکمہ صحت کی ٹیموں کے ساتھ بھرپور تعاون کریں، تاکہ مہم کامیاب اور علاقے سے تشنج کا مکمل خاتمہ ہوسکے۔

خبر کا کوڈ: 828804