اسلام ٹائمز - پی ٹی آئی میں کوئی مافیا نہیں ہے دیگر جماعتوں میں ہے، فواد چوہدری

پی ٹی آئی میں کوئی مافیا نہیں ہے دیگر جماعتوں میں ہے، فواد چوہدری

ایک نجی ٹی وی چینل سے گفتگو میں وفاقی وزیر کا کہنا تھا کہ ہمیں حکومت میں آکر نیب کی صفائی کرنی چاہیئے تھی، ہمیں حکومت میں آکر پراسیکیوشن کی اوورہالنگ کرنا تھی، ہمیں حکومت میں آکر کیسز کے چالان کا جائزہ لینا چاہیئے تھا۔

اسلام ٹائمز۔ وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ پی ٹی آئی میں کوئی مافیا نہیں ہے، دیگرجماعتوں میں ہے۔ تفصیلات کے مطابق ایک نجی ٹی وی چینل سے گفتگو کرتے ہوئے فواد چوہدری کا کہنا تھا کہ پی ٹی آئی میں کوئی مافیا نہیں ہے، دیگر جماعتوں میں ہے، کوئی غیر قانونی قیمتیں کنٹرول کر رہا ہے تو وہ مافیا ہے۔ وفاقی وزیر نے کہا کہ اسپیکر قومی اسمبلی کو کہا کہ مہنگائی سے متعلق کمیٹی بنا لیں، اسپیکر قومی اسمبلی کو یہ بھی کہا کہ مہنگائی پر بحث کرا لیں، اسمبلی میں بحث ہونی چاہیئے اور کمیٹی تشکیل دینی چاہیئے۔

فواد چوہدری کا کہنا تھا کہ اپوزیشن اسمبلی میں بغیر تیاری آتی ہے، اپنے کیس پر رو دھو کر چلے جاتے ہیں، تیاری نہیں ہوتی، ہمارا حال بھی اچھا نہیں ہے۔ انہوں نے کہا کہ تمام کیسز نون لیگ کے دور میں بنائے گئے، ہم نے کوئی کیس نہیں بنایا، چیئرمین نیب سے لے کر چپڑاسی تک نون لیگ کے تعینات کردہ ہیں، احتساب کا قانون نواز شریف نے بنایا تھا۔ وفاقی وزیر نے مزید کہا کہ ہمیں حکومت میں آکر نیب کی صفائی کرنی چاہیئے تھی، ہمیں حکومت میں آکر پراسیکیوشن کی اوورہالنگ کرنا تھی، ہمیں حکومت میں آکر کیسز کے چالان کا جائزہ لینا چاہیئے تھا۔