اسلام ٹائمز - کشمیر سے متعلق فیصلہ نہیں بدلوں گا، نریندر مودی

کشمیر سے متعلق فیصلہ نہیں بدلوں گا، نریندر مودی

بھارتی ریاست اترپردیش کے شہر وارانسی میں اپنے حلقے میں جلسے سے خطاب کرتے ہوئے نریندر مودی نے کہا کہ آرٹیکل 370 اور متنازع شہریت قانون کے فیصلے بھارت کے لیے ضروری تھے۔

اسلام ٹائمز۔ بھارتی وزیراعظم نریندر مودی نے اپنی ہٹ دھرمی برقرار رکھتے ہوئے کہا ہے کہ انہیں عالمی دبائو کی پروا نہیں اور کشمیر سے متعلق وہ اپنا فیصلہ نہیں بدلیں گے۔ تفصیلات کے مطابق بھارتی وزیراعظم نے کہا ہے کہ وہ کشمیر سے متعلق آرٹیکل 370 کے خاتمے اور متنازع شہریت قانون پر قائم رہیں گے۔
بھارتی ریاست اترپردیش کے شہر وارانسی میں اپنے حلقے میں جلسے سے خطاب کرتے ہوئے نریندر مودی نے کہا کہ آرٹیکل 370 اور متنازع شہریت قانون کے فیصلے بھارت کے لیے ضروری تھے۔ بھارتی وزیراعظم نے کہا کہ دنیا بھر کے دباؤ کے باجود ہم ان فیصلوں پر قائم رہیں گے۔

اس موقع پر ایودھیا میں بابری مسجد کی جگہ رام مندر بنانے کے حوالے سے نریندر مودی نے بتایا کہ مندر کی تعمیر کے لیے ایک ٹرسٹ بنا دیا گیا ہے جس کے تحت جلدازجلد مندر کی تعمیر مکمل کی جائے گی۔