اسلام ٹائمز - پی ٹی آئی کا سندھ حکومت کا کووِڈ ریلیف آرڈیننس عدالت میں چیلنج کرنے کا اعلان

پی ٹی آئی کا سندھ حکومت کا کووِڈ ریلیف آرڈیننس عدالت میں چیلنج کرنے کا اعلان

ایک بیان میں اپوزیشن لیڈر سندھ اسمبلی کا کہنا ہے کہ اس قانون سازی سے 80 فیصد وفاق متاثر ہوگا، لاک ڈاؤن کے دوران جب ادارے کمائیں گے نہیں تو کیسے ملازمین کو تنخواہیں دیں گے، یہ آرڈیننس انصاف کے اصولوں کے خلاف ہے، یہ قانون سازی صرف تالیاں بجوانے کے لئے ہے، اس پر عمل کرانا بہت مشکل ہے۔

اسلام ٹائمز۔ پاکستان تحریک انصاف کے رہنما اور سندھ اسمبلی میں اپوزیشن لیڈر فردوس شمیم نقوی نے سندھ حکومت کا منظور کردہ کورونا ریلیف آرڈیننس عدالت میں چیلنج کرنے کا اعلان کردیا۔ فردوس شمیم نقوی کا کہنا ہے کہ سندھ کابینہ کی جانب سے کووڈ 19 آرڈیننس کی بھرپور مذمت کرتا ہوں، بغیر سوچے سمجھے اس قسم کی قانون سازی پہلی بار دیکھ رہا ہوں۔ اپوزیشن لیڈر سندھ اسمبلی کا کہنا ہے کہ یہ آرڈیننس انصاف کے اصولوں کے خلاف ہے، یہ قانون سازی صرف تالیاں بجوانے کے لئے ہے، اس پر عمل کرانا بہت مشکل ہے۔

ان کا کہنا ہے کہ سندھ حکومت بجلی اور گیس کے بلوں میں رعایت دینے کی قانونی طور پر اہل نہیں، وفاق کے ماتحت آنے والے اداروں کے حوالے سے حکومت کیسے فیصلہ کرسکتی ہے؟ فردوس شمیم نقوی کا کہنا ہے کہ اس قانون سازی سے 80 فیصد وفاق متاثر ہوگا جب کہ اس کا سہرا سندھ حکومت اپنے سر سجا رہی ہے، لاک ڈاؤن کے دوران جب ادارے کمائیں گے نہیں تو کیسے ملازمین کو تنخواہیں دیں گے۔ واضح رہے کہ دو روز قبل سندھ کابینہ نے سندھ کووڈ 19 ایمرجنسی ریلیف آرڈیننس 2020ء منظور کیا تھا جسے منظوری کے لئے گورنر سندھ کو بھجوا دیا گیا ہے اور اب اس کی منظوری کا انتظار ہے۔