QR Code

عمر بن عبدالعزیز اور حضرت عمار بن یاسر جیسے اکابر کے مزارات کی بے حرمتی پر پوری امت دل گرفتہ ہے، لیاقت بلوچ

4 Jun 2020 12:27

جماعت اسلامی کے مرکزی رہنما کا کہنا تھا کہ او آئی سی کو فوری طور پر اس قبیح جرم کا ارتکاب کرنے والوں کو بے نقاب کر کے اس پر سخت ایکشن لینا ہوگا تاکہ آئندہ کسی کو محترم ہستیوں کے مزاروں کی بے حرمتی کی جرات نہ ہو۔

اسلام ٹائمز۔ ملی یکجہتی کونسل پاکستان کے سیکرٹری جنرل اور جماعت اسلامی کے مرکزی رہنما لیاقت بلوچ نے شام میں خلیفہ اسلام حضرت عمر بن عبدالعزیز ؒ اور ان کی اہلیہ کے مزاروں، جسد خاکی کی بے حرمتی پر سخت رنج و غم کا اظہار کرتے ہوئے اس سانحہ کی شدید مذمت کی ہے۔ لاہور سے جاری کیے گئے بیان میں انہوں نے کہا ہے کہ اس سے قبل بھی شام میں حضرت عمار بن یاسرؓ اور دیگر اکابرین کے مزاروں کی بے حرمتی کی گئی، ایسی ناپاک جسارت کوئی مسلمان نہیں کر سکتا، یہ اسلام دشمن قوتوں کی سوچی سمجھی سازش ہے تاکہ عالم اسلام میں نفرت کی آگ بھڑکا کر اپنے مذموم مقاصد پورے کر سکیں۔ انہوں نے کہا کہ پوری امت مسلمہ اس واقعہ پردل گرفتہ ہے، او آئی سی کو فوری طور پر اس قبیح جرم کا ارتکاب کرنے والوں کو بے نقاب کر کے اس پر سخت ایکشن لینا ہوگا تاکہ آئندہ کسی کو محترم ہستیوں کے مزاروں کی بے حرمتی کی جرات نہ ہو۔ انہوں نے کہا کہ عالم اسلام کے حکمرانوں کو بھی اس موقع پر اتحاد و یکجہتی کا مظاہرہ کرتے ہوئے اس واقعہ کے خلاف مشترکہ لائحہ عمل بنانا ہوگا تاکہ امت کو انتشار سے بچایا جاسکے۔

خبر کا کوڈ: 866539