QR Code
چینی بحران کے ذمے داروں پر مقدمات چلانے کی منظوری کیلئے اجلاس طلب
7 Jun 2020 00:02
اجلاس میں معاون خصوصی احتساب مرزا شہزاد اکبر چینی بحران کے ذمہ داران کے خلاف کارروائی کے لیے سفارشات پیش کریں گے۔ شوگر انکوائری کمیشن کی رپورٹ میں جن افراد کو بحران کا ذمہ دار قرار دیا گیا ہے، ان کے خلاف فوجداری مقدمات نیب اور ایف آئی اے کو بھجوائے جانے کا امکان ہے۔
اسلام ٹائمز۔ چینی بحران میں ملوث افراد کے خلاف گھیرا تنگ ہو رہا ہےا ور شوگر انکوائری رپورٹ میں ذمے دار قرار دیے جانے والوں کے خلاف کارروائی کے لیے وزیراعظم عمران خان نے کل (اتوارکو) اعلی سطحی اجلاس طلب کرلیا ہے۔ ذرائع کے مطابق اجلاس میں بحران کا ذمہ دار قرار دیے گئے افراد کے خلاف مقدمات دائر کرنے کا فیصلہ ہوگا اور اجلاس میں معاون خصوصی احتساب مرزا شہزاد اکبر چینی بحران کے ذمہ داران کے خلاف کارروائی کے لیے سفارشات پیش کریں گے۔ شوگر انکوائری کمیشن کی رپورٹ میں جن افراد کو بحران کا ذمہ دار قرار دیا گیا ہے، ان کے خلاف فوجداری مقدمات نیب اور ایف آئی اے کو بھجوائے جانے کا امکان ہے، جس کی حتمی منظوری اتوار کو وزیراعظم کی زیرصدارت اعلی سطح اجلاس میں دی جائے گی۔
واضح رہے کہ گزشتہ ماہ حکومت کی جانب سے چینی بحران پر ایف آئی اے کے تحقیقاتی کمیشن کی رپورٹ عام کردی گئی ہے علاوہ ازیں رپورٹ کا فرانزک آڈٹ بھی کیا جاچکا ہے۔ اس رپورٹ میں حکومتی پارٹی اور اپوزیشن پارٹی کے رہنماؤں اور کاروباری شخصیات کو بحران کا ذمے دار قرار دیا گیا ہے۔
خبر کا کوڈ: 867018