QR Code

وزیراعلیٰ سندھ نفرت نہ پھیلائیں، صوبے کا نظام درست کریں، فردوس شمیم نقوی

20 Aug 2020 01:41

انصاف ہاؤس کراچی میں پی ٹی آئی رہنما نے پریس کانفرنس کرتے ہوئے کہا کہ کراچی کے مسائل حل نہ ہوئے تو وفاق کے پاس سب آپشن موجود ہیں، شہر کو تباہ کرنے والے پیپلز پارٹی اور ایم کیو ایم لندن کے لوگ ہیں، اگر صوبے کا نظام درست نہ ہوا تو ہم وزیراعلیٰ ہاؤس کا گھیراؤ کریں گے۔

اسلام ٹائمز۔ سندھ اسمبلی میں قائد حزب اختلاف فردوس شمیم نقوی نے کہا ہے کہ وزیر اعلیٰ صوبے کے لوگوں میں نفرت نہ پھیلائیں، سندھ کا نظام درست کریں، اگر ایسا نہ ہوا تو ہم وزیراعلیٰ ہاؤس کا گھیراؤ کریں گے۔ انصاف ہاؤس کراچی میں پی ٹی آئی کے رہنماؤں کی جانب سے پریس کانفرنس کا انعقاد کیا گیا، جس سے خطاب میں سندھ اسمبلی میں اپوزیشن لیڈر فردوس شمیم نقوی کا کہنا تھا کہ کراچی کے مسائل حل نہ ہوئے تو وفاق کے پاس سب آپشن موجود ہیں۔ انہوں نے یہ بھی کہا کہ شہر کو تباہ کرنے والے پیپلز پارٹی اور ایم کیو ایم لندن کے لوگ ہیں۔

اس موقع پر پاکستان تحریک انصاف کے مرکزی جنرل سیکریٹری عامر محمود کیانی کا کہنا تھا کہ 18 ویں ترمیم کے بعد بلدیاتی نظام صوبو ں کو طے کرنا ہوتا ہے۔ پیپلز پارٹی کو اہلیت کی بنیاد پر کراچی کے لئے کام کرنا ہوگا ورنہ صوبہ مزید تباہ ہوجائے گا۔ انہوں نے مزید کہا کہ سندھ حکومت اپنے معاملات درست کرے، ان سے کام نہیں ہوتا، یہ سندھ کارڈ کھیل رہے ہیں، کراچی کو وفاق کے حوالے کرنے کے بیان پر پیپلز پارٹی کی جانب سے سندھ میں ہونے والے مظاہرے انکی ناہلی ظاہر کرتے ہیں۔

خبر کا کوڈ: 881356