QR Code

ملکی خودمختاری کی خلاف ورزی کرنیوالوں کیلئے "نشانے پر مار کرنیوالا اسلحہ" بالکل تیار ہے، اکرم الکعبی

28 Sep 2020 20:56

ٹوئٹر پر جاری ہونیوالے ایک پیغام میں عراقی عوامی مزاحمتی فورس حرکۃ النجباء کے کمانڈر نے بغداد میں واقع امریکی سفارتخانے کیجانب سے انواع و اقسام کے دفاعی سسٹمز کی آزمائش اور دوسری فوجی سرگرمیوں پر شدید تنقید کرتے ہوئے اس سلسلے میں دوٹوک قومی موقف کا مطالبہ کیا ہے۔

اسلام ٹائمز۔ عراقی سرکاری افواج میں شامل عوامی مزاحمتی فورس حرکت النجباء کے کمانڈر شیخ اکرم الکعبی نے ٹوئٹر پر جاری ہونے والے اپنے ایک پیغام میں دارالحکومت بغداد کے اندر واقع امریکی سفارتخانے کی عسکری سرگرمیوں پر دوٹوک قومی موقف اپنانے کا مطالبہ کیا ہے۔ حرکۃ النجباء کے سربراہ نے اپنے پیغام میں لکھا کہ ہم بغداد کے درمیان واقع، قومی خودمختاری کی دھجیاں بکھیرنے والے فساد و دہشتگردی کے فوجی اڈے جس کو "امریکی سفارتخانہ" کہا جاتا ہے، کے خلاف قومی (عسکری و سیاسی) قیادت کے دوٹوک موقف کے منتظر ہیں۔ شیخ اکرم الکعبی نے مزید لکھا کہ اگر اس حوالے سے تمام فریق خاموش ہیں تو مزاحمتی محاذ کے پاس اس سلسلے میں دوٹوک موقف موجود ہے اور وہ یہ کہ "نشانے کے عین اوپر مار کرنے والا اسلحہ" بالکل تیار کر لیا گیا ہے۔

خبر کا کوڈ: 888948