QR Code
ایران کے جوہری سائنسدان محسن فخریزادہ کے بہمانہ قتل پر آغا سید حسن کا اظہار صدمہ
29 Nov 2020 20:36
انجمن شرعی شیعیان کے صدر نے مقتول سائنسدان کی شہادت کو دنیائے اسلام کیلئے ایک ناقابل تلافی نقضان قرار دیتے ہوئے کہا کہ ایسے انسانیت سوز حربوں سے اسلامی جمہوریہ ایران کو مظلومین جہاں کی حمایت اور نصرت کے دینی فریضے سے باز نہیں رکھا جا سکتا ہے۔
اسلام ٹائمز۔ اسلامی جمہوریہ ایران کے جوہری سائنسدان محسن فخری زادہ کے بہمانہ قتل پر گہرے صدمے کا اظہار کرتے ہوئے جموں و کشمیر انجمن شرعی شیعیان کے صدر آغا سید حسن الموسوی الصفوی نے اسے انقلاب اسلام ایران کے خلاف استکباری قوتوں کی گھناؤنی سازش کی ایک اور کڑی قرار دیا ہے۔ آغا سید حسن نے کہا کہ عالمی سامراجی قوتوں کی سر توڑ کوششوں کے باوجود ایرانی قوم و قیادت کے جذبہ انقلاب اور استقامت کو متزلزل نہیں کیا جا سکا۔ انہوں نے کہا کہ انقلاب دشمن قوتیں ایران سے براہ راست ٹکر لینے کے بجائے کئی سال سے بزدلانہ حربوں کا سہارا لے رہی ہیں۔ آغا سید حسن نے مقتول سائنسدان کی شہادت کو دنیائے اسلام کے لئے بالعموم اور اسلامی جمہوریہ ایران کے لئے ایک ناقابل تلافی نقضان قرار دیتے ہوئے کہا کہ ایسے انسانیت سوز حربوں سے اسلامی جمہوریہ ایران کو مظلومین جہاں کی حمایت اور نصرت کے دینی فریضے سے باز نہیں رکھا جا سکتا ہے۔ آغا سید حسن نے شہید کی خدمات اور جذبہ ایمان کو خراج تحسین پیش کرتے ہوئے اس صدمہ جانکاہ پر ایران قوم و قیادت رہبر معظم حضرت آیت اللہ اعظمیٰ سید علی خامنہ ای اور شہید کے لواحقین و پسماندگان سے تعزیت کی اور مرحوم کے بلند درجات کے لئے دعا کی۔
خبر کا کوڈ: 900690