اسلام ٹائمز - ضلع سکردو کو 600 کرونا ویکسین موصول

ڈی ایچ او سکردو کے مطابق ابھی تک 61 ہیلتھ ورکرز کو ویکسین کا پہلا ڈوز دیا جا چکا ہے، ویکسین کا پہلا ڈوذ این سی او سی کے جاری کردہ ایس او پیز کے تحت فرنٹ لائن ورکرز اور ڈاکٹرز کو دیا جا رہا ہے۔

اسلام ٹائمز۔ ڈپٹی کمشنر سکردو حافظ کریم داد چغتائی کی زیر صدارت ڈسٹرکٹ ویکسین ایڈمنسٹریشن اینڈ کوآرڈنیشن کمیٹی کا اجلاس ہوا، جس میں کمیٹی کے ممبران نے شرکت کی۔ اجلاس کو ڈسٹرکٹ ہیلتھ آفیسر (ڈی ایچ او) سکردو نے بتایا کہ پہلے مرحلے میں کورونا ویکسین کا پہلا ڈوذ این سی او سی کے جاری کردہ ایس او پیز کے تحت فرنٹ لائن ورکرز اور ڈاکٹرز کو دیا جا رہا ہے۔ ضلع سکردو کو کل 600 کورونا ویکسین موصول ہو چکی ہے اور ابھی تک 61 ویکسین رجسٹرڈ ہیلتھ ورکرز کو دی جا چکی ہے اور یہ عمل جاری رہے گا۔ ڈپٹی کمشنر نے ایکسین برقیات کو ہدایات جاری کرتے ہوئے کہا کہ کورونا ویکسین سنٹرز آر ایچ کیو، بینظیر شہید ہسپتال گمبہ سکردو، سول ہسپتال تھوار روندو، پی سی آر لیب اور ڈی ایچ او آفس سکردو کو بلا تعطل بجلی کی فراہمی کو یقینی بنایا جائے تاکہ مریضوں کو زیادہ سے زیادہ سہولیات اور کورونا ٹیسٹ کے عمل کو یقینی بنایا جا سکے۔