اسلام ٹائمز - دنیا کی کوئی طاقت قرآن پاک کے ایک لفظ کو بھی بدل نہیں سکتی، علامہ رضی جعفر نقوی

دنیا کی کوئی طاقت قرآن پاک کے ایک لفظ کو بھی بدل نہیں سکتی، علامہ رضی جعفر نقوی

اجلاس سے خطاب میں صدر جعفریہ الائنس کا کہنا تھا کہ یہ امت مسلمہ کے درمیان پھوٹ ڈالنے کی ایک ناپاک کوشش ہے اور یہ علماء ہند و مفتیان ہند کی شرعی مسئولیت ہے کہ وہ اس معاملے میں اپنی منصبی ذمہ داریوں کو پورا کرکے اس ملعون کیخلاف فتویٰ صادر کریں۔

اسلام ٹائمز۔ جعفریہ الائنس پاکستان کی مرکزی کابینہ کا ہنگامی اجلاس بارگاہ حسینی میں علامہ سید رضی جعفر نقوی کی زیر صدارت منعقد ہوا، جس میں مرکزی کابینہ کے علامہ حسین مسعودی، علامہ باقر حسین زیدی، علامہ نثار قلندری، علامہ فرقان حیدر عابدی، علامہ علی کرار نقوی، علامہ اصغر شہیدی، علامہ رجب علی بنگش، شبر رضا، سبط رضا، قاسم نقوی، شاہد بادامی، ضیاءالحسن، یعقوب شہباز، شہزاد رضوی، شمس رضوی، محمد مہدی، نیئر علی، ثروت رضوی، حسن مہدی و دیگر نے شرکت کی۔ اجلاس سے خطاب کرتے ہوئے علامہ سید رضی جعفر نقوی نے وسیم رضوی کو اسلام دشمن طاقتوں کا زرخرید آلہ کار قرار دیتے ہوئے کہا کہ قرآن پاک مقدس آخری آسمانی صحیفہ ہے اور قیامت تک نوع بشریت کے لئے وسیلہ ہدایت و نجات ہے، دنیا کی کوئی طاقت قرآن پاک کے ایک لفظ کو بھی بدل نہیں سکتی۔

ان کا کہنا تھا کہ یہ امت مسلمہ کے درمیان پھوٹ ڈالنے کی ایک ناپاک کوشش ہے اور یہ علماء ہند و مفتیان ہند کی شرعی مسئولیت ہے کہ وہ اس معاملے میں اپنی منصبی ذمہ داریوں کو پورا کرکے اس ملعون کے خلاف فتویٰ صادر کریں، مذکورہ شخص مسلک اہلبیت (ع) کا لبادہ اوڑھے ہوئے دراصل شیعیت کی بدترین توہین و تذلیل کر رہا ہے، ماضی میں بھی کئی لوگوں نے تحریف قرآن کرنے کی کوشش کی، لیکن وہ سب اپنے مکروہ عزائم میں ناکام ہوئے۔ جعفریہ الائنس پاکستان نے اجلاس کے آخر میں یہ فیصلہ کیا کہ وسیم رضوی ملعون کے خلاف آئندہ جمعہ ملک بھر کی تمام جامع مساجد میں جمعہ کے خطبات میں مذمت اور بھرپور پُرامن مظاہرے منعقد کئے جائیں گے۔