اسلام ٹائمز - حکومت مظلوم کو دیوار سے لگانے کی بجائے سینے سے لگائے، پروفیسر ابراہیم خان

حکومت مظلوم کو دیوار سے لگانے کی بجائے سینے سے لگائے، پروفیسر ابراہیم خان

مرکزی نائب امیر جماعت اسلامی کا دھرنے سے خطاب کرتے ہوئے کہنا تھا کہ بنوں جانی خیل میں قتل کئے جانے والے چار بے گناہ نوجوانوں کا خون رائیگاں نہیں جائے گا۔ حکومت کی طرف سے اس سانحے پر مسلسل خاموشی بے حسی اور ظلم پر مبنی ہے۔

اسلام ٹائمز۔ جماعت اسلامی پاکستان کے مرکزی نائب امیر پروفیسر محمد ابراہیم خان نے کہا ہے کہ بنوں جانی خیل میں قتل کئے جانے والے چار بے گناہ نوجوانوں کا خون رائیگاں نہیں جائے گا۔ حکومت کی طرف سے اس سانحے پر مسلسل خاموشی بے حسی اور ظلم پر مبنی ہے۔ جانی خیل قوم کے نوجوانوں کے قاتلوں کی گرفتاری حکومت کے لئے چیلنج ہے۔ حکومت قاتلوں کو جلد از جلد گرفتار کرکے قرار واقعی سزا دے۔ بے گناہ نوجوانوں کے لواحقین کو تنہا نہیں چھوڑیں گے۔ ان خیالات کا اظہار انہوں نے دیگر ضلعی قیادت کے ہمراہ علاقہ جانی خیل کے دورہ کے دوران وہاں پر جاری چار نوجوانوں کے قتل خلاف دھرنے سے خطاب میں کیا۔ اس موقع پر ضلعی امیر پروفیسر اجمل خان، شمالی وزیرستان کے امیر رحمٰن اللہ، الخدمت فاؤنڈیشن ضلع بنوں کے صدر سید محمد جلال شاہ ایڈووکیٹ، صوبائی نائب صدر جے آئی یوتھ ڈاکٹر عبدالروف قریشی و دیگر بھی موجود تھے۔

پروفیسر محمد ابراہیم خان کا کہنا تھا کہ پہلے روز سے ہی سینیٹر مشتاق احمد خان نے اس ظلم کے خلاف آواز اٹھائی ہے، اس مسئلہ کو سینیٹ کے فلور پر مشتاق احمد خان، قومی اسمبلی میں مولانا عبدالاکبر چترالی اور صوبائی اسمبلی میں عنایت اللہ خان کو بھرپور آواز اٹھانے کیلئے کہوں گا۔ انہوں نے کہا کہ حکومت کو چاہئیے کہ وہ مظلوم کو دیوار سے لگانے کی بجائے سینے سے لگائے۔ جماعت اسلامی مظلوموں کی ساتھی ہے۔ جانی خیل قوم کا جو بھی فیصلہ ہوگا ہم اس کی حمایت کریں گے۔